雅虎香港新聞 【電影LOL】《狂野時速》拍埋第11集收工 想搵呢位男神助陣埋尾
電影《狂野時速》(Fast and Furious)自2001年第一集面世後，續集越拍越大陣仗，票房亦越嚟越勁，絕對係荷里活其中一個最賺錢同長壽嘅系列電影！不過拍咗20年有多，幾受歡迎都有曲終人散嘅一日，根據美媒Hollywoord Reporter嘅報導，《狂》將會拍埋第10同第11集就會正式同影迷say goodbye！
餘下2集《狂》繼續由林詣彬（Justin Lin）導演執導，佢由《狂6》開始接手導演一職，絕對係系列大收特收嘅功臣。《狂7》首周全球票房高達3.92億美元，成為史上首周票房成績第4位，僅次於《哈利波特》6、7及《復仇者聯盟》。《狂8》雖然美國開畫比第7集遜色，不過單喺中國首周週末票房接近2億，高過哂系列首3集票房總和！
上兩集咁收得，《F9狂野時速》製作更重本，飛機大炮大量飛車場面就實走唔甩，上個月女主角Michelle Rodriguez接受訪問時仲唔覺意爆料，話《F9》飛車飛到出太空！雖然即時澄清自己無咁幸運可以上太空，不過外界推測Vin Diesel飾演嘅Dominic最大機會上太空！
《F9》場景拍到上太空之餘，演員陣容亦更上一層樓，有樂壇天后Cardi B客串一角，仲加入2大影后Charlize Theron及Helen Mirren，當然fans最期待一定係於《狂野極速：飄移東京》中「陣亡」嘅韓哥（Han)翻生演出！《F9》已經上埋太空，作為系列收尾嘅第10、11集，仲可以點拍？
《狂野時速》編劇之一Chris Morgan受訪時多次提到，好想邀請男神Keanu Reeves加入《狂》大家庭，有諗過搵奇哥喺外傳《狂野時速：雙雄聯盟》中飾演恐怖組織Eteon首領。不過角色最後喺《狂》中只有聲音演出，連樣都無！Chris話最難係度奇哥個期，一旦成事，仲話會出盡腦汁幫奇哥度個有趣又夠爆嘅角色喎。如果屬實，《狂》10、11集應該會更有睇頭！
原定於今年上映嘅《F9》受新冠疫情影響，宣布推遲1年至2021年4月2日上映，導演把握時間做後期，據聞仲重拍咗部份場面為續集舖路！雖然系列就快完，不過電影公司點會咁易放棄金蛋？《狂》外傳電影《狂野時速：雙雄聯盟》確定有續集，未來仲計劃幫《狂》女角出外傳電影，睇嚟長拍長有喎！
更多電影文章
【電影LOL】Cinema City半夜澄清 否認上映撐警片《時代》
【電影LOL】日本漫畫真人版電影《碧藍之海》 賣點竟然係「保證睇到靚仔露鳥」？！
【電影LOL】抗爭運動做背景 《時代》預告片出爐睇到有黑人問號
【電影LOL】選美題材影視精選 呢套Netflix劇爆過Emily in Paris居然要腰斬？
