【電影LOL】盛傳賣價6億美元無人吼 美高梅否認《007:生死有時》網上公映

·3 分鐘文章

外媒The Variety報導,耗資超過資2.5 億美元拍攝嘅《007:生死有時》有意改變上映計劃,將作品直接售予串流平台,007電影嘅代表美高梅(MGM)即時澄清消息不實,仲話《007》之所以多次延期,改至下年4月上映,就係為咗觀眾可以透過大銀幕欣賞占士邦風采咁話。

《007:生死有時》作為「鐵金剛」系列第25部作品,又係男主角Daniel Craig嘅畢業作,之後佢會卸任占士邦一角,單係呢兩點已經為電影增加唔少話題。過去由Daniel Craig主演4集007亦為美高梅帶嚟可觀收益,《新鐵金剛:智破天凶城》全球收入達12億美元,《007:鬼影帝國》收到8億美元,預計《生死有時》收益達12億美元!

美高梅基本靠「007」嘅收益維持營運,所以最新一集嘅上映計劃絕對影響佢地生死!雖然美高梅否認捨棄傳統院線上映,不過單係延期上映已經令電影公司損失至少3000萬美元,加上疫情未見曙光,《007:生死有時》能否如期下年4月上映仍為未知之數。有見迪士尼《花木蘭》靠自家串流平台首映大賺,Sony將《雷霆戰艦:獵犬號》獨家賣俾Apple TV又賺到億億聲,有傳美高梅為咗止蝕,分別同Netflix及AppleTV初步洽談。

《007:生死有時》入面有大量品牌置入,改變上映形式要得到一眾贊助商同意,難度甚高;加上為咗止蝕,網上串流版權費首要足以抵銷鉅額製作費,如果放棄院線上映,又要賠返宣傳費、發行費俾幫佢做全球發行嘅環球影業,仲要留返啲維持公司營運,加加埋埋變成叫價6億美元!

單deal因為叫價太高而傾唔成,Apple TV曾經高價買過唔少影視作品,不過暫時未見平台有咩起色,6億美金買一年播映權唔化算;而Netflix本身自家製作內容非常強,季季都有話題作,製作費仲經濟好多,無需要天價購入《007:生死有時》。如果Netflix真係買,動機都應該係俾業界知佢資金有幾充裕。

而且,《007:生死有時》咁大製作又係Daniel Craig最後一次做007,咁都直上串流平台,以後換人再拍占士邦未必引得返觀眾入戲院。美高梅可能考慮到影響成個「007」品牌而作罷。不過,新冠疫情一日未過去,院線上映始終有隱憂,難保蝕到入肉嘅時候會割價保命!

如果大片如《生死有時》傾成串流平台首映唔上戲院,勢必影響整個影業生態,戲院息微成為夕陽工業,而電影公司只會製作更多適合串流平台嘅電視電影,對觀眾都未必係好事!

而家因為「007」電影前途未卜,下任占士邦人選遲遲唔公布,今次真係牽一髮動全身嘞。

更多電影文章

【電影LOL】今個星期睇咩戲 《老豆死開一陣先》《決戰非常外公》《奪命守門人》《玩命直播》《劇場版 紫羅蘭永恆花園》

【電影LOL】Cinema City半夜澄清 否認上映撐警片《時代》

【電影LOL】《狂野時速》拍埋第11集收工 想搵呢位男神助陣埋尾

【電影LOL】日本漫畫真人版電影《碧藍之海》 賣點竟然係「保證睇到靚仔露鳥」?!

【電影LOL】抗爭運動做背景 《時代》預告片出爐睇到有黑人問號

【電影LOL】選美題材影視精選 呢套Netflix劇爆過Emily in Paris居然要腰斬?

【電影LOL】楊千嬅出紀錄片回顧人生 呢班巨星嘅紀錄片講奮鬥史講埋政治