雅虎香港新聞 【電影LOL】奇洛李維斯越殺越有 《殺神John Wick》系列收得 第4、5集一次過開拍
通常片商都會睇住電影票房成績，再決定拍唔拍續集。當然都有例外嘅，好似《魔戒》三部曲，一來片商有信心，二來計過數外景後期片酬加埋成本唔平，一次過拍晒三集，除返開有so。
最新一套用呢種行內叫back to back拍法一次過拍2集嘅新戲，就係奇洛李維斯（Keanu Reeves)嘅《殺神John Wick》第4、5集。2014年上畫嘅《殺神John Wick》成本2千萬，北美開畫收1千4百幾萬，埋單全球收近1億，睇落唔算標青但係口碑好，於是片商出多一倍成本拍續集。結果又真係扑中，2017年上畫時北美收近1億，咁梗係再開第3集啦。舊年嘅《殺神John Wick 3》片房又上一級，全球收3億幾美金，簡直幾何級數咁上。由第一集嘅退休殺手為狗報仇，到第3集成為全球殺手目標，奇哥真係越殺越有、越殺越好賺！
咁大隻金蛋，《殺神John Wick 4》當然準備好上馬，本來安排下年5月上畫……well，咁當然又又又係疫情關係，要推遲到2022年5月先上。電影公司有見及此，於是安排《殺神John Wick 5》連同第4集一次過拍攝，現階段劇組正係處理劇本，以及等男主角「奇哥」下年年初有期開工。
咁奇哥而家拍緊咩戲？就係影迷睽違多年嘅《22世紀殺人網絡》第4集！話時話，《22世紀殺人網絡》第2同3集都係以back to back一開二處理，當年一拍就拍咗1年半。咦，唔通奇哥腳頭好，拍親動作大片都打爆票房開到續集？係就不如拍埋小編好like嘅《魔間行者》啦！
更多電影文章
【電影LOL】疫情影響計唔掂數《星空奇遇記》新戲籌備工作煞停
