雅虎香港新聞 【電影LOL】《花木蘭》又出事 片尾名單感謝再教育營負責單位 外國網友狠批迪士尼虛偽
《花木蘭》又出事！戲有戲運，《花》一定行衰運，電影由開拍至今風波不斷，由早期故事設定、角色大改動引起《花木蘭》動畫版影迷不滿，後來又有主角劉亦菲撐警言論辣著香港觀眾，事件發酵至其他地區，台灣、泰國加入聲討行動，組成「奶茶聯盟」發起杯葛行動。
而一心向中國市場靠攏嘅迪士尼，一方面販賣女性獨立自主、Girl Power、英雌精神，同一時間對「＃杯葛花木蘭」（#boycottmulan)一事裝聾扮啞零回應。據《華爾街日報》透露迪士尼為咗內地票房，密切同中國政府合作，聽取意見務求令電影呈現到中國價值觀，包括模糊故事發生嘅朝代，所以戲內生於北魏、應該係蒙古人嘅木蘭，竟然住喺13世紀先喺南方福建一帶出現嘅土樓，兩個時代相差幾百年！
既然過到中國電檢審批，又幾時到觀眾計較歷史準確性？萬事俱備，今年3月連世界首映都做埋，偏偏遇上新冠疫情全球肆虐，上映計劃大亂。終於捱到9月上映，但半年間經過新冠疫情、#Blacklivematters以及中美貿易政治角力洗禮，觀眾睇戲要求從此不一樣！
改於串流平台上映嘅《花木蘭》，令認真嘅影迷有時間慢慢閱讀片尾感謝名單，有眼利網友發現名單上竟然有新疆維吾爾自治區委員會宣傳部、吐魯番公安局，即係新疆「再教育營」嘅負責單位！
《花》導演Niki Caro早於訪問提到，曾經留喺新疆幾個月睇景，近年西方國家嚴行「政治正確」方針，到底係劇組無sense，定係個地方真係靚到無與倫比、非此地不拍攝可？做咁多資料搜集，最後竟然決定喺集中營旁邊拍戲？
西方一向重視種族議題，《花》依家唔止同支持警暴拉上關係，仲觸碰到中共被指同穆斯林少數族裔受逼害有關嘅人道問題。BBC、Hollywood Reporter等外媒甚為關注《花》選址新疆拍攝一事，而迪士尼繼續選擇唔回應，連美國網友都睇唔過眼，批評迪士尼以「英雄」、「自主自強」賺大錢，但係對真正社會不公保持沉默，好虛偽咁話。
迪士尼唔回應，可能諗住捱到星期五內地正式上映，賺到錢過咗海就係神仙，弊在內地觀眾未睇先劣評，出發點同警暴、人權無關係，而係覺得西人唔識拍中國文化，套戲老土到喊喎！
只可以話投資幾億，對準中國市場嘅《花木蘭》生得太遲，早幾年，未有＃metoo、#blacklivesmatter、政治正確覺醒，以上問題都唔係問題，一定無損票房收入。不過今時唔同往日，觀眾睇戲唔再單純只為娛樂咁簡單。
更多電影文章
【電影LOL】許鞍華《第一爐香》預告片曝光 被批選角出事 彭于晏唔似瘦弱公子
【電影LOL】一心靠中國票房回本 《花木蘭》終於上畫 內地網民瘋狂負評
【電影LOL】脫離皇室自立 哈里同梅根簽Netflix拍片賺1億美金
