電影LOL︳《功夫熊貓4》預告片曝光 阿寶今次嘅對手係條變色龍

前日掀到今年14套成本2億美元以上嘅大片當中，可能得1套《銀河守護隊3》有錢賺，其餘可能會蝕本嘅，過半數係續集或者重拍，足以證明片廠食老本呢招未必行得通。

明年3月會上北美學校春假檔期嘅《功夫熊貓4》，近日已經發布預告片，如果計埋11月感恩節嘅紐約大巡遊上，《功夫熊貓》主角阿寶嘅巨型公仔現身的話，套戲上之前4個月就做宣傳，似乎片商都唔敢怠慢。

《功夫熊貓4》講到成為神龍大俠嘅阿寶有新使命，就係要成為和平谷精神領袖。但係要阿寶靜心修練，佢個腦就會諗起食！同一時間，一條能夠隨時變身嘅變色龍正係「猴」住阿寶嘅智慧權仗。阿寶要搵人幫手仲要訓練新一代神龍大俠，而佢身邊出現一隻精甩邊嘅通緝犯狐狸，呢隻小蠱惑係咪和平谷新救星？

主角阿寶英語版繼續由Jack Black負責配音，其他角色大量引入亞裔演員發聲，包括金球影后Awkwafina、《奇異女俠玩救宇宙》嘅關繼威同「公公」吳漢章，同埋喺美國以楝篤笑打出名堂嘅Ronny Chieng。

唔覺唔覺，上一套《功夫熊貓》已經係8年前。而早於2010年上完第一集之後，製作嘅夢工場已經話有意將《功》發展成一共6集嘅系列式電影，不過到2022年夢工場先正式宣佈開拍《功4》。隔咗咁耐，觀眾應該有返啲新鮮感，而且又會有一批小朋友認識阿寶，希望票房唔會太差啦。

前3集香港版配音都係由Eason陳奕迅聲演阿寶，唔知今集仲係唔係佢獻聲？如果要新人選，我提議ERROR隊長肥仔（梁業）。大碼身型但超級靈活，同肥仔一樣！

更多電影文章

電影LOL 今期睇咩戲︳蒼鷺與少年／五月的你，十二月的她／成功補習班／熱搜／電影 光之美少女 All Stars F

電影LOL︳大片齊仆直！今年14套2億美元鉅製 得呢套有錢賺

電影LOL︳金球獎《Barbie芭比》9項提名先贏《奧本海默》一仗 新增「電影與票房成就大獎」係乜？

電影LOL︳宮崎駿《蒼鷺與少年》北美開畫成票房冠軍 拎住2個影評人大獎直衝奧斯卡

電影LOL︳《史密夫決戰史密妻》劇集版 冇型男索女兼探討婚姻與寂寞咁大膽？

電影LOL︳集齊一線大星 新片Average Heigh, Average Build拍唔成關氣候變化事？

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！