雅虎香港新聞 電影LOL︳《小丑》式瘋狂 殺手片專家洛比桑新片Dogman 又有愛狗男冧友？
法國大導洛比桑多年來拍過唔少以殺手為題材嘅作品，2019年嘅前作Anna之外，仲有成名作《這個殺手不太冷》（Leon the professional)同《墮落花》（Nikita），堪稱殺手片專家。而佢最新作品Dogman，從剛剛推出嘅預告片可見，相信都係大開殺戒嘅電影。
現時所知Dogman嘅故事講述一個男仔Douglas自細俾老豆虐待，仲試過掟佢入去狗籠，但係籠內嘅狗狗反而對佢Douglas好過人，起碼冇傷害佢。自此Douglas就對狗狗愛護有家，仲收養好幾隻。不過由預告可見，似乎有壞人殺上門要搵Douglas晦氣，佢於是擸齊架生同狗狗一齊死過！
Douglas一角由2年前憑NITRAM一片贏得康城影帝嘅Caleb Landry Jones演繹。觀乎預告片中Douglas有易服戲份，加上拎起槍又佈晒陣「恭候」敵人嘅狂傲癲喪，確有幾分似《小丑》。而Douglas愛狗嘅人設，咪即係《殺神John Wick》？不過以洛比桑嘅往績，應該會拍出與別不同嘅風格。
本來Dogman今年春天上映，但據講喺年初嘅歐洲電影交易會上評價極佳，片商決定變陣安排套戲參加威尼斯影展，並且延遲到9月底上映，靠口碑做起聲勢，甚至有望衝擊下年各頒獎禮。
更多電影文章
電影LOL 今期睇咩戲︳職業特工隊 : 死亡清算上集／看不見聽不見也愛你／月之圓缺
電影LOL︳《職業特工隊 : 死亡清算上集》開畫全球收2.5億美元 《芭比Barbie》被睇好高開一倍
電影LOL︳《不能說的秘密》韓國拍完到日本 日版男女主角三地中最弱？
電影LOL︳《芭比Barbie》出現南海九段線被越南禁映 片商解畫︰絕無表態之意
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
