雅虎香港新聞 電影LOL︳等足7年《異形》新片新導演接手 下年上映
尋日提到昆頓塔倫天奴正式落閘講明《標殺令》唔會拍第3集，令影迷等足20年都係得個桔。反觀科幻恐怖片經典《異形》嘅fans就好彩得多，雖則等足7年，但起碼有新片睇！
《異形》由大導演列尼史葛執戲，1979年第一套作品上映後可謂驚世駭俗，以外星生物營造恐怖而刺激氣氛，絕對係sci-fi horror經典，仲啟發出唔少同類電影。如果唔計同《鐵血戰士》嗰隻Predator crossover嘅作品，四十幾年來《異形》系列只係拍咗6套戲，對上一套係2017年嘅《異形：聖約》。
根據外媒Collider報導，新一套《異形》已經完成拍攝工作，而家進入後期製作階段，估計可以喺下年暑假檔上映。呢套《異形》相信會同前6套好唔同，首先導演唔再係列尼史葛，而係交棒俾新晉嘅驚慄片導演Fede Álvarez。Fede Álvarez拍過嘅《禁室殺戮》，2016年以小搏大成功，1千萬美元（下同）成本收返1.6億票房！至於演員都係大量新人，包括「真人版Dora」Isabela Merced、《為副不仁》嘅Cailee Spaeny等等，個個廿幾出頭咋。而《異形》元老、曾經慘被異形「蹂躪」嘅薛歌妮韋花都已經確認唔會拍。
新人事之下，據知呢集《異形》會係獨立故事，同前作冇咩關係，但係會撲埋你塊面嘅異形一定繼續出現！
更多電影文章
電影LOL 今期睇咩戲︳奪寶奇兵之命運輪盤／別叫我賭神／露比格曼：海怪神話／速命道／#小心陷井／生化危機：死亡之島
電影LOL︳喪屍出沒 係社畜翻身之日？日本漫改片《殭屍100~在成為殭屍前要做的100件事~》
電影LOL︳揭盅！David Corenswet 成新任《超人》雙料視后Rachel Brosnahan演愛人Lois
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
