宣萱為101歲傭人英姐慶生：佢將我當係自己親生女養大

現年53歲嘅宣萱外型性格剛中帶柔，除咗係高學歷學霸及凍齡女神之外，其「御用人質」身分亦令人留下深刻印象。前日（19日）宣萱喺社交網站上載為自細照顧佢嘅傭人英姐慶祝101歲生日，二人一齊切蛋糕嘅照片。

宣萱喺IG上載佢同英姐嘅照片，並留言話：「Can never thank Ying Je enough for loving and raising me. Not sure how I would have turned out without her. Today is her 101st birthday! A very Happy Birthday to her and most importantly - 身體健康、開開心心！（永遠無法感謝英姐對我嘅愛及撫養。唔知道如果冇咗佢，我會變成點樣。今日係佢101歲嘅生日，祝佢生日快樂，同埋最重要係身體健康、開開心心！）」相片中嘅宣萱打扮樸素，帶埋生日蛋糕前往老人院探望英姐，而英姐頭髮濃密，望落精神奕奕，面露喜悅咁同宣萱合照。

呢個PO一出，唔少網民除咗祝福壽星女英姐，而宣萱亦有回覆：「She raised me as her own daughter（佢將我當係自己親生女養大）」，網民仲大讚宣萱飲水思源：「感恩的心 thats why you are my favourite artist for more than 25 years」。

喺2019年，宣萱曾帶英姐亮相HOY TV節目《放學後》 接受好友陳慧珊訪問，期間講到英姐對佢人生嘅影響。提及自己喺12歲到英國留學，全靠英姐嘅教導令佢可以獨立及自理。

宣萱無論工作有幾忙碌，佢都會抽空時間去陪伴英姐，同阿哥及大嫂陪英姐飲茶，佢哋會偷偷地請英姐飲佢最鍾意嘅可樂，因為老人院唔俾佢飲。宣萱更指去到人生呢個階段，佢好珍惜每一次與英姐見面嘅機會。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！