JW王灝兒宣布恢復單身 拍拖6年富貴男友葉韋彤去年破產

女歌手JW王灝兒今日喺社交平台出片，剪輯唔同嘅生活片段，但上面寫道Almost forgot how its like to be single after 13 years of being in a relationship（身處一段關係13年後，差點忘記單身是怎樣的），似乎暗示已經同男友葉韋彤(Tarzan）告一段落。而片段最尾JW都寫上In My Happy Girl Era，又喺po文寫Life is great, I’ll be okay ，相當正面。

下月34歲生日嘅JW，同Tarzan傳出戀情至少6年，本來風平浪靜。不過前年有報導指出，創立美妝零售業務上市公司嘅Tarzan父母葉俊亨及鍾佩雲，連同Tarzan一家三口被一間財資管理服務公司入稟高等法院提出破產呈請。最後Tarzan同媽媽去年2日被法庭頒令破產，同日JW推出歌曲《陪你》，歌詞寫道「在窘境我會 陪你休閒」、「期待白髮也繼續玩」，估唔到二人最終未能「繼續玩」。

JW同Tarzan拍拖6年，多次傳過婚訊。據知JW亦相當能夠同Tarzan家人及朋友打成一片，又陪過「未來奶奶」入馬場。而Tarzan亦相當細心照料女友，JW開show前經常陪伴在側，又會同JW打網球。不過近排已經少見JW出post放閃，3月時JW更自爆終於扚起心肝去雪卵。

近年加入TVB嘅JW，雖然未再有好似《矛盾一生》嘅代表作，但大台入屋效應依然帶來一定收入。JW年初被爆榮升業主，以950萬元喺東半山渣甸山購入大坑台567平方呎兩房單位，不受Tarzan破產影響置業目標。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！