雅虎香港新聞 電影LOL︳《職業特攻隊︰死亡清算 上集》被睇好至少收8億美金 導演大口氣︰打贏Top Gun
暑假檔期大片蓄勢待發，打票房戰之前梗係打吓牙骹戰。下月上畫嘅《職業特攻隊︰死亡清算 上集》導演Christopher McQuarrie接受外媒訪問時，當然要有幾句夠爆嘅soundbite製造話題。Christopher McQuarrie話，唔會將《職》同《新鐵金剛》以及《殺神John Wick》呢類系列式動作片作對比，因為「要贏人先要贏自己」，不過就豪言「一定砌低」舊年票房之冠嘅《壯志凌雲︰獨行俠》！
湯告魯斯主演嘅《壯》去年總收14.6億美元，而呢一集《職業特攻隊》繼續有「湯爺」搏晒命上陣。即使今個暑假有《芭比Barbie》、《奧本海默》同《奪寶奇兵：命運輪盤》等大片，但係而家業界預計《職》至少收8億美元，並且睇好套戲有本事靠口碑長做長有，收10億都唔出奇。
咦，之但係Christopher McQuarrie咪就係《壯志凌雲︰獨行俠》個編劇？自己打自己，公我贏字又唔輸，難怪咁大口氣！但係主角湯告魯斯就真係同人挑機嘞，因為《職業特攻隊》同《奧本海默》2套戲都想用IMAX播放，一來視覺刺激，二來IMAX可以收貴啲。但係由於《職》喺7月12日上畫，之後7月21日係《奧》同《芭比Barbie》開畫，湯告魯斯就發火話IMAX銀幕俾呢2套戲搶晒！而IMAX老細Rich Gelfond就開聲安撫「湯爺」，話希望《奧本海默》上完之後，可以畀返IMAX嘅期《職業特攻隊》。畢竟《奧本海默》用IMAX專用攝影機拍，Rich Gelfond梗係大細超。
更多電影文章
電影LOL︳新片Maestro成獎項大熱 畢列谷巴轉型做導演被力捧 已經傾緊下套戲
電影LOL︳迪士尼《元素大都會》身負救票房重任 張敬軒Serrini聲演水火不容嘅愛情故事
電影LOL︳Amber Heard潛完水 月尾現身電影節宣傳新片 隨時同前夫Johnny Depp 同場
電影LOL︳《瑪利歐》收得 盛傳任天堂搵環球開拍《薩爾達傳說》電影版動畫
電影LOL︳宮崎駿真引退作品《你想活出怎樣的人生》只出海報做宣傳 預告片都冇！
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
