電影LOL︳《瑪利歐》收得 盛傳任天堂搵環球開拍《薩爾達傳說》電影版動畫

新一代《薩爾達傳說》遊戲《王國之淚》推出冇耐，好多人都煲緊隻game，早排鄭伊健仲自爆同太太一齊打機打到唔願出門口！

《薩爾達》本身充滿故事性，fans亦都追隨多年，加上開發商任天堂有份投資嘅《超級瑪利歐兄弟大電影》相當收得，至今全球狂收10億美元票房，天時地利之下，《薩爾達》當然有機會開拍電影版。

影評人Jeff Sneider早前喺podcast爆料，指環球影業正係同任天堂傾緊《薩爾達》電影版事宜，仲話成事機會相當高，估計會係環球旗下動畫廠牌Illumination（前作包括《壞蛋獎門人》）另一傑作。Jeff Sneider仲話，環球一方相當有信心，願意大灑金錢(spending a pretty penny）去製作《薩爾達》電影版。

《薩爾達傳說》1986年推出至今，經歷唔同遊戲機種轉變，細個嘅玩家而家做晒爸爸，隨時同仔女一齊打機，呢個如意算盤打得響！不過亦有《薩爾達》fans擔心，呢隻game本身係「劇情片」，做開合家歡動畫嘅Illumination未必掌握到氛圍。加上《瑪利歐》片中塞咗大量流行曲入去，Illumination會唔會搞到《薩爾達》電影版變成一套特長版MV？甚至有fans認為，搵返日本動畫大師宮崎駿嘅吉卜力工作室去處理就最對味！

更多電影文章

電影LOL 今期睇咩戲︳變形金剛：狂獸崛起／大俠胡金銓 第一部曲 - 先知曾經來過

電影LOL︳宮崎駿真引退作品《你想活出怎樣的人生》只出海報做宣傳 預告片都冇！

電影LOL︳《變形金剛：狂獸崛起》內地搞戶外IMAX首映 玩埋AR機械人陪你散步

電影LOL︳迪士尼為節流怒炒Pixar元老 救返《反斗奇兵2》被刪檔案嘅功臣都冇得留低

電影LOL︳荷里活導演公會同片廠達成協議 編劇企硬繼續工業行動 嚟緊連演員都罷工？

電影LOL︳《馴龍記》系列翻拍真人版 女主角人選再惹《小魚仙》式選角爭議

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！