電影LOL︳迪士尼為節流怒炒Pixar元老 救返《反斗奇兵2》被刪檔案嘅功臣都冇得留低

美國編劇工會罷工，各大片廠鬧人才、故事荒，迪士尼偏偏唔留人仲放人走！迪士尼要減低總成本55億美元，包括員工薪酬中減25億。迪士尼為咗減省成本，大刀闊斧裁走7000名影視相關嘅員工。

迪士尼出唔少童話故事，不過作為商業機構，故事係產品賺錢先係目的，裁員名單中就驚見彼思Pixar《光年正傳》嘅導演兼監制Angus MacLane及Galyn Susman。

兩人分別效力Pixar多年，Angus做咗26年動畫師參與過《玩轉極樂園》、《超人特工隊2》、《反斗奇兵4》，而Galyn自1995年首集《反斗奇兵》已經喺Pixar，兩個都屬超資深Pixar元老級人馬！

Galyn仲有一個救世佳話︰《反斗奇兵2》因為人為失誤成個檔案被刪，好彩當時Galyn放產假帶咗個備份檔返屋企，迪士尼先執返身彩有戲可上，否則可能無呢套續集，同埋第3、第4集！

外媒The Deadline報導，迪士尼裁員時不時發生，不過鮮有裁動畫部門。對上一次動畫部大地震已經係2013年，當時因為《恐龍大時代》（The Good Dinosaur）上映計劃延誤，導致包括導演Bob Peterson在內等60名員工被炒，今次再炒得多啲，總共裁咗75人。

《光年正傳》唔收得成為被裁主因，作為全球賣座《反斗奇兵》系列外傳，搵埋「美國隊長」Chris Evans配音，動用超過2億美元製作，可惜全球票房強差人意只收獲2.26億美元，蝕到入肉！投資失敗搵人問責，就咁炒咗元老級曾經立過無數功勞嘅員工。製作童話嘅地方，唔一定有童話世界嘅人情味！

更多電影文章

電影LOL 今期睇咩戲︳蜘蛛俠：飛躍蜘蛛宇宙／犯罪都市：鐵拳掃毒／凶門惡煞／配樂大師：ENNIO

電影LOL︳荷里活導演公會同片廠達成協議 編劇企硬繼續工業行動 嚟緊連演員都罷工？

電影LOL︳《馴龍記》系列翻拍真人版 女主角人選再惹《小魚仙》式選角爭議

電影LOL︳《小魚仙》內地票房麻麻 竟然被指係因為「種族歧視」

電影LOL︳《閃電俠》搵巨星打口碑 連湯告魯斯都like 導演口快快自爆片中彩蛋

電影LOL︳荷里活編劇罷工 竟然導致Ryan Reynolds拍《死待3》被禁爆肚？

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！