電影LOL︳《馴龍記》系列翻拍真人版 女主角人選再惹《小魚仙》式選角爭議

荷里活翻拍潮越演越熱，繼迪士尼將所有動畫真人化後，環球影業都加入翻拍大軍，將極受歡迎嘅動畫《馴龍記》（How to Train Your Dragon）系列翻拍真人版，由《接駁靈聲》Mason Thames及《最後生還者》Nico Parker主演。

《馴龍記》改編自英國作家Cressida Cowell暢銷同名小說，首集於2010年推出，故事講述怕醜內向嘅維京少年思噎仔（Hiccup），因為未能馴服惡龍而受到族人嘲笑及白眼，及後佢無意間拯救咗受傷嘅飛龍無牙仔，人同龍仲成為好朋友，展開感人又歡樂嘅成長旅程。

首集大受歡迎，所以環球影業於2014年及2019年推出2套續集，《馴龍記》系列全球大收接近16億美元（折合約125億港元）票房。收得之餘分別收獲4個奧斯卡金像獎提名，《馴2》更獲得金球獎最佳動畫殊榮，成績驕人。

今次真人版《馴龍記》，搵返動畫版導演兼編劇Dean DeBlois主理，除咗《馴》外DeBlois仲主理過勁受歡迎嘅2002年《扮嘢小魔星》（Lilo & Stitch）及經典動畫《花木蘭》（1998年），講故事能力有保證，真人版反而擔心電腦特效 － 條龍太像真嚇親細路，太卡通又投入唔到。

選角方面一樣備受關注，男主角思噎仔由15歲男星Mason Thames飾演，佢喺《接駁靈聲》（The Black Phone）中同Ethan Hawke合作嶄露頭角，嚟緊仲同Mel Gibson合作Boys of Summer，值得關注。

女主角阿翠（Astrid）則由18歲《最後生還者》、《小飛象》女星Nico Parker飾演。唔少網友攞Nico 同《小魚仙》嘅Halle Bailey比較，因為原著中嘅阿翠係金髮碧眼嘅維京人，而Nico貴為星二代（《職業特工隊》英國黑人女星Thandie Newton同編導Ol Parker個女），混血外貌同原著維京人有出入，唔尊重原著咁話。亦有口賤網民表示受過《小魚仙》洗禮，Nico易接受咗！真人版《馴龍記》預計2025年3月上映。

更多電影文章

電影LOL 今期睇咩戲︳蜘蛛俠：飛躍蜘蛛宇宙／犯罪都市：鐵拳掃毒／凶門惡煞／配樂大師：ENNIO

電影LOL︳《小魚仙》內地票房麻麻 竟然被指係因為「種族歧視」

電影LOL︳《閃電俠》搵巨星打口碑 連湯告魯斯都like 導演口快快自爆片中彩蛋

電影LOL︳荷里活編劇罷工 竟然導致Ryan Reynolds拍《死待3》被禁爆肚？

電影LOL︳康城影展參展作另類指標 今屆邊套戲觀眾起立拍掌拍得最耐？

電影LOL︳周冬雨新片《燃冬》康城獲好評 同劉昊然3場床戲拍到撻著？

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！