雅虎香港新聞 電影LOL︳康城影展參展作另類指標 今屆邊套戲觀眾起立拍掌拍得最耐？
第76屆康城影展進行到一半，全球巨星雲集，因為有唔少電影選擇喺康城做世界首映，映後風評絕對影響電影走向及商業價值。不過康城好評未必睇分數，而係睇完場後觀眾有無起立鼓掌同拍幾耐手，有外媒甚至做埋統計，紀錄歷年康城參展電影映後起立鼓掌時長，排頭位係2006年由Guillermo del Toro《魔間迷宮》，足足拍咗22分鐘！今日就同大家睇吓今屆最多掌聲有邊幾部電影：
《怪物》
導演：是枝裕和
主演：安藤櫻、永山瑛太
故事：單親媽媽因為兒子受傷，要求學校解釋，校長老師推卸責任，雙方拉扯期間意外暴露兒子秘密。。。
起立鼓掌：9分半鐘。是枝裕和係康城常客，2004年憑《誰知赤子心》令14歲嘅柳樂優彌成為最年輕康城影帝。《怪物》掌聲比前作《小偷家族》15分鐘短，不過暫時冠絕康城影展。
《花月殺手》
導演：馬田史高西斯
主演：里安納度狄卡比奧、羅拔狄尼路
故事：揭開1920年代俄克拉荷馬州發生嘅多宗針對原住民命案。
起立鼓掌：9分鐘。女角莉莉格斯桐預測獲得奧斯卡提名。
May December
導演：托迪希恩斯（Todd Haynes）
主演：妮妲莉寶雯、茱莉安摩亞
故事：一對老妻少夫，因為年齡差距而曾經話題十足，20年婚姻因為一位女演員為新片角色來訪，而再次翻起暗湧。
起立鼓掌：8分鐘。
Firebrand
導演：Karim Aïnouz
主演：祖狄羅、艾莉西亞菲瑾德
故事：英格蘭國王亨利八世與妻子凱瑟琳·帕爾嘅婚姻生活。
起立鼓掌：8分鐘
《杜巴利伯爵夫人》
導演：Maïwenn
主演：Johnny Depp
故事：杜巴利由平民上位成為法國國王路易十五嘅情婦。
起立鼓掌：7分鐘。似係支持Johnny Depp復出多過套戲。
《小行星都市》
導演：韋斯安德遜 Wes Anderson
主演：謝遜斯化哲曼、施嘉莉祖安遜
故事：《小行星都市》是一套關於太空、外星人與世界變動的故事，1995 年全國各地學生和家長聚集沙漠小鎮參加學術競賽，卻意外被一宗震撼世界的外星事件打亂原訂行程，讓眾人都困在此沙漠小鎮⋯⋯
起立鼓掌：6分鐘。好多巨星、畫面好靚，屬禮貌又不失客氣嘅反應。
《奪寶奇兵之命運輪盤》
導演：占士曼高
主演：夏里遜福
故事：鍾斯博士環跨世界歷險，今集將由摩洛哥展開，再次展開驚險刺激的終極奪寶之旅！
起立鼓掌：5金鐘。基本禮貌以示對福伯嘅尊敬。
電影以外，HBO劇集由Lily Depp、Blackpink成員Jennie主演嘅The Idol 都有參展播放頭2集。可能只係得一部分唔夠完整，所以得5分鐘掌聲。
近年康城站立鼓掌時間10分鐘左右已經好勁，上屆湯唯主演《分手的決心》映後掌聲得8分鐘，無礙朴贊郁攞走康城最佳導演大獎。最搞笑應該係第72屆嘅《上流寄生族》，因為導演奉俊昊太餓叫停，所以拍得8分鐘，最後勇奪康城金棕櫚大獎，仲成為韓片傳奇揚威奧斯卡！照咁睇，而家獲得最長拍掌聲加持嘅《怪物》，如果獲得康城大獎，有望攻佔出年奧斯卡！
更多電影文章
電影LOL 今期睇咩戲︳狂野時速10／本日公休／世上只有爸爸好
電影LOL︳周冬雨新片《燃冬》康城獲好評 同劉昊然3場床戲拍到撻著？
電影LOL︳演出大導演馬田史高西斯新作《花月殺手》 里安納度居然要求改劇本？
電影LOL︳Jason Momoa 《狂野時速10》極搶戲 The Rock不甘寂寞唔拍又拍？
電影LOL︳邦女郎Ana新片荒島尋找人生意義 片廠爭崩頭多得編劇罷工？
電影LOL︳楊紫瓊老是常出現 《綠野仙蹤前傳》演校長 仲有十套新戲新劇預佢
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
