電影LOL︳荷里活編劇罷工 竟然導致Ryan Reynolds拍《死待3》被禁爆肚?

荷里活編劇公會罷工持續,對小編有影響(因為好多新片叫停,即係冇新聞,亦即係冇題目好寫……)事小﹐各大片廠未有齊劇本嘅project一律hold住,咁先大件事。

Marvel超級英雄片《死待3》(Deadpool 3)本來出晒劇本,以為可以逃過一劫,仲有傳打算今個月頭就開工。但因為呢次罷工涉及一個好濕碎嘅條件,令到套戲都係未拍得。

原因竟然係︰男主角Ryan Reynolds唔可以爆肚!

是咁的,外媒Collider報導,今次編劇罷工令到各個project當中有關劇本嘅修改都唔郁得。即使本身公會嘅協議訂明,監製同導演可以在拍攝期間,就劇本對白作出些許修改。但係由於Ryan Reynolds係《死待3》編劇之一,好多gag同笑位都係佢臨場度嘅,而家編劇罷工,Ryan Reynolds法律上亦唔可以喺片場度gag嘞。

弊就弊在,前兩集《死待》Ryan Reynolds都度咗好多口賤gag,甚至講過劇中角色Wade Wilson「每句對白都係我自己寫」,令到套戲生色不少之餘,而家全組人仲企咗喺度添。

新片未開得工住,Ryan Reynolds可能有多啲時間湊下3年前買入嘅英國地方球隊Wrexham FC。自從佢入主之後,隊波就成為話題,早排更加因為成績優異而升班英乙聯賽。

更多電影文章

電影LOL 今期睇咩戲︳小魚仙/譯戰同盟/失衡凶間之罪與殺/人生路不熟/不止不休/媽打對決小布殊

電影LOL︳康城影展參展作另類指標 今屆邊套戲觀眾起立拍掌拍得最耐?

電影LOL︳周冬雨新片《燃冬》康城獲好評 同劉昊然3場床戲拍到撻著?

電影LOL︳演出大導演馬田史高西斯新作《花月殺手》 里安納度居然要求改劇本?

電影LOL︳Jason Momoa 《狂野時速10》極搶戲 The Rock不甘寂寞唔拍又拍?

電影LOL︳邦女郎Ana新片荒島尋找人生意義 片廠爭崩頭多得編劇罷工?

按此下載 全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!