電視台對撼史（上）TVB買《包青天》睇漏眼 亞視偷雞成功同時播 《睇真D》大戰《城追》

TVB 同ViuTV今個禮拜起同時段播出推理節目《死因有可疑》及《嫌疑事件簿》，多年冇出現嘅對撼場面終於再現。歷年來電視台用同類節目打對台嘅情況時有發生，九十年代更加白熱化，呢2次大對決可以話係好睇過節目本身！

雙包案 觀眾焗睇《包青天》

1993年，台灣華視將家傳戶曉嘅《包青天》再度拍成劇集，反應出奇地好，由15集不斷添食至236集。時任TVB主席邵逸夫爵士睇完之後決定買入，並安排喺黃金時間播放，當年大台少有將外購劇放喺合家歡時段，但係收視相當不俗。

處於弱勢嘅亞視居然搵到辦法︰原來《包青天》嘅版權代理合約上，冇寫明TVB買下香港獨家播放權，於是亞視大半年後接洽買入同一套《包青天》，仲安排同一時段出街。亞視仲可以趁住TVB仍然有幾十集存貨搶先播出，而根據當時TVB高層陳志雲憶述，TVB如臨大敵，準備好將未出街單元配音，甚至考慮跟亞視播同一個單元，用慣性收視贏對手。

好在當時剩返嘅集數唔多，晚晚包大人大戰包大人嘅場面只係維持幾個月，而TVB亦都只係輸面子，收視贏返晒。

余詠珊得意之作《睇真D》迫大台變陣

早排辭任大台助理總經理嘅余詠珊，90年代由大台過檔為亞視創造嘅資訊節目《今日睇真D》可以話係佢嘅成名作。1994年3月開播嘅《睇真D》以軟性手法處理新聞及娛樂話題，形式比新聞報導更有彈性，亦對準大台同時段播劇集嘅弱點，因此收視節節上升。最經典嘅莫過於公開「解剖外星人」片段！

TVB有見及此，半年後照辦煮碗推出《城市追擊》，由黃霑、鄭裕玲及安德尊等主持，節目形式類近《睇真D》，甚至安排同時段播放。最終《睇真D》製作至2000年底，而《城市追擊》喺1999年被《天地最前線》取代，而家播緊嘅《東張西望》喺形式上都係沿襲《城市追擊》。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！