霸佔ViuTV黃金時段 強尼中年棄工程師轉投娛樂圈

有「全能強尼」之稱嘅ViuTV藝人強尼（許博文），無論係做戲、主持、足球評論員定係唱歌都瓣瓣掂，真係多才多藝呀！近日強尼霸佔ViuTV三個黃金時段，包括《暖男爸爸》飾演阿榮（鄭中基飾）好友Lantau、《全民造星III》主持及《晚吹：有酒今晩吹》主持，難怪佢會成為ViuTV台柱。

原來強尼唔係演戲出身，入行前佢喺建築行業做咗10年工程師。雖然佢大學時參加過大專聯校歌唱比賽，亦有唱片公司邀約試音，但因公司重組而令強尼無法做歌手，畢業後順利成章成為薪水非常可觀嘅工程師。佢認為自己以前係個被倒模出來嘅人，理性話俾佢知讀完大學當工程師最簡單，行一條所有人都認為嘅「康莊大道」。

直至04年，熱愛足球嘅強尼參加有線電視招募成為足球節目主持，由一個月講二十多場波， 到奧運一日三個騷，一個月可以賺到三個月嘅錢，之後再接觸有線娛樂台主持和新城電台主持工作。可惜之後喺有線工作出現問題，工作量愈來愈少，為咗家人佢決定重返建築行業。有一年半時間佢係要建築和講波兩邊走，從而令佢認清自己方向。後來強尼離開有線，並加入剛成立半年嘅ViuTV ，開始參與不同類型嘅節目，拍劇及主持等等都有佢嘅蹤影，早前更與《Chill Club》中獻唱《越吻越傷心》，獲得唔少網民讚賞。另外，強尼亦好多謝太太理解及支持，令佢可以走出舒適圈。