雅虎香港新聞 韓國米芝蓮名廚首間海外餐廳進駐中環 必試人參雞湯Risotto
喺香港食韓國嘢，好多時都會諗起食炸雞、部隊鍋或燒肉嘅餐廳。不過最近就有一間主打精緻概念嘅韓國菜Hansik Goo悄悄抵港，餐廳由首爾米芝蓮兩星食府及亞洲50最佳餐廳「Mingles」主理人姜珉求開設，主打用佢創意思維去演繹正宗韓食，亦係主廚於海外開設嘅首間餐廳。
Hansik於廣東話為「韓食」，寓意 一家人一起用膳，而Goo就意指由名廚姜珉求精心炮製的韓式料理，主廚希望提供一個不一樣嘅韓食用餐體驗畀食客。
暫時餐廳只供應呢款$780嘅晚市八道菜菜單，韓食嘅靈魂食材醬、泡菜及人參都由韓國入口，前菜Bugak 韓式傳統雜錦脆片，呢款食物就算對韓國菜較熟悉嘅朋友都比較陌生，因為靈感源於傳統韓式寺廟美食，以海藻、魚皮、 辣椒和紫蘇葉製作而成的各款時令韓式脆片，香口開胃。
Yukhoe 澳洲和牛韃靼配韓國梨子、耶路撒冷雅枝竹，選用澳洲和牛，肉質軟腍，加入韓國香梨令味道更清新，配上耶路撒冷雅枝竹脆片同鵪鶉蛋黃，幾有新鮮感。
人參雞湯飯就食得多，用人參雞製成嘅Risotto又食過未？Samgye Risotto 人參雞湯意大利飯結合咗兩款經典韓國美食，分別係韓國人參雞湯及韓式炸雞。先以雞骨熬湯製作Risotto，然後慢煮雞胸肉及雞腿製成雞肉卷，塗上粘米粉，炸至外脆 內嫩。
Korean Style Fish 香煎紅鯛魚配醃製兩年泡菜，香煎鯛魚醃製兩日，魚肉嫩滑。配上醃製兩年嘅泡菜以及野生芝麻油同芝麻，滿滿韓國風味。
主菜方面，客人可以二選一，Bulgogi 韓式醬油牛肉配雜菜碗，牛肉以自家製韓式湯醬油醃製，可以配埋韓式炒粉絲包生菜食。而唔食牛嘅朋友可以揀Barbecue Duo 韓式烤雞、豬肉配雜菜碗。
甜點方面，呢個Omija 酸模葉雪芭配五味子紅莓汁味道酸酸地，帶有淡淡五味子香氣，食完咁多菜式後食就最啱啦！
地址: 中環擺花街8號2樓
文: Yanica
相、片: Calvin Kwok
