韓國選秀節目《放學後的心動》參加者最細只有11歲惹爭議
早前內地7人男團「天府少年團」出道,因成員平均年齡只得8歲,引起網民熱烈討論及狠批,指影響一班小朋友成長及身心發展,結果組合喺出道僅4日便宣佈解散。而韓國電視台MBC即將推出選秀節目《放學後的心動》,近日仲已經公開參加者嘅資料,不過有部份參加者嘅年齡太細,引起網民輿論。
MBC早前宣布舉辦選秀活動,目的係幫助一班立志成為偶像歌手嘅練習生,希望佢哋可以有更多機會成功追夢。節目喺今年五月開始招募,參加者國藉不受限制,只要佢哋係韓國年齡11歲以上就可以報名參加,喺短短一個月就有超過8.7萬人報名,真係相當驚人!
最終有84位參加者成功入圍,節目組仲將佢哋按照年齡分成一年級到四年級小組,而年紀介乎11至13歲嘅參加者就被安排喺一年級小組,該組嘅參加者有18人,而當中最細嘅兩位就喺2010年8月及9月出生,即係啱啱慶祝完11歲生日。節目未正式出街,已經引起網民熱烈討論,認為佢哋年紀太細,唔適合出道做偶像,因為過早接觸娛樂圈會影響佢哋身心發展,同時影響佢哋嘅學業。
部分一年級小組參加者:
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!