顧客投訴播太多MIRROR歌 建議播兒歌粵曲 網民：咁唯有播多啲Error平衡吓囉！

ViuTV旗下男團MIRROR人氣爆燈，成功掀起香港久違嘅追星熱潮，真係3歲去到80歲嘅觀眾都成為「​鏡粉」。大家喺行街嘅時候，12子嘅廣告隨處可見，行百貨公司及商場亦會聽到MIRROR嘅團歌或者係成員solo歌。今日網上就流傳一張Aeon分店嘅顧客心聲，內容寫上：「店主你好！這個舖設在藍田，我本人認為在這個地方較為多老人家，因此為了配合大眾的口味，我在此建議不要在播那麼多mirror的歌，三兩分鐘又聽到一首，煩死了。在此建議播一些兒歌或粵曲，適合不同年齡層的人，Thanks！」

百貨公司係喺8月21日收到客人嘅「顧客心聲」，而店長非常有效率咁喺22日親自回應話：「親愛的顧客，感謝您的意見，有關店內的背景音樂，是由本公司統一安排，我們會反映閣下的意見。在往後的安排中，能加入不同類型的音樂，提升店內的購物氣氛，期待您再次光臨本店。多謝！」

一班網民似乎唔係好認同呢位顧客，紛紛留言話：「大眾口味唔係mirror咩？ 唔係老人口味wor, Aeon又唔係兒童樂園播乜兒歌」、「咁唯有播多啲Error平衡吓囉！」、「粤曲兒歌真心趕客」、「7月嚟播粵曲…….我諗無人敢入去」、「而家小朋友既歌多是mirror既歌」、「播兒歌或粵曲都痴筋...」、「就係播mirror 我先行得多咗」及「聽粵曲同兒歌只係一小撮人，但剝削大部份顧客嘅利益，難道呢位顧客有什麼特權？如店舖接納了此客人嘅要求，沒其他人客前來光顧，捐失嘅只係店舖，投訴客戶會賠償店舖嗎？」等等。

不過亦有網民認同並留言話：「對!吾好再播Mirror la~本身冇事都變煩」、「真心講太多，太厭啦，廣告又見到佢地，連行超市都聽到，真擾人」及「周街都係Mirror又真係好煩」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！