飛虎3壯志英雄｜何慈茵秉承經典武打演員徒孫之名做打女 望拍師公遺作

由苗僑偉、黃宗澤、吳卓羲、張兆輝等演員出演嘅無綫劇集《飛虎3壯志英雄》昨晚（21日）首播，連環槍戰飛車場面逼真及卡士強勁，何慈茵（Charlene）亦喺劇中飾演沛國流亡公主Renee（蕾妮），除咗有混血女神之美譽，原來佢同圈中人甚有淵源，與雨僑為表姐妹，更出身自武打世家。

何慈茵爸爸係英國人何麥（Mark Houghton），媽媽為香港人Wendy，父親18歲來港向一代經典武打演員及導演劉家良拜師學藝，後來成為洪拳師傅及電影武術指導兼演員，何慈茵亦成為徒孫，5歲已接觸功夫，逐漸對功夫著迷，於是14歲時提出想學功夫，成為爸爸嘅門生；何麥對何慈茵絕不心軟，要求與男徒弟一樣苛刻，雖然何慈茵媽媽唔捨得佢受傷，但最終都放手畀佢做中意嘅嘢。

背負「劉家良徒孫」之名嘅何慈茵2016年曾參與ViuTV女子MMA（綜合格鬥技）比賽節目《G-1格鬥會挑戰賽》；2018年又於《G-1格鬥會2》中贏得冠軍金腰帶。何慈茵亦希望成為打女演員，2017年曾出演電影《空手道》，2020年簽約邵氏五年及簽約TVB一年，希望復興香港武打片，而《飛虎3壯志英雄》就係佢簽約邵氏後首套劇集，首集劇情已涉及恐怖襲擊行動，需要出演槍戰等多場動作戲；據悉，何慈茵喺劇中打足14集，佔嘅戲份好重。何慈茵亦解釋師公劉家良生前留下最後一份劇本，希望入行有機會完成師公心願，將佢最後一份作品呈現於觀眾眼前。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！