食肉獸私藏 親民價石燒牛店及扒房

無肉不歡嘅食肉獸，通常都會私藏咗幾間「飯堂」，隨時想去就去，想食就食。今日要介紹嘅兩間餐廳，一間主打石燒牛肉，一間供應多款肉扒選擇，加上價錢親民，要隨時滿足食肉慾望就絕對要放入口袋裡喔。

牛極

石燒牛嘅熱潮一直冇退減，好似呢間石燒牛店咁，分店仲愈開愈多，而家共有9間分店啦。餐廳供應多款嚟自美國、日本或澳洲等地嘅牛肉，有唔同部位同重量選擇，全部牛肉都經過熟成處理，令肉質變得較軟腍。師傅會預先將牛肉煎到一成熟左右，就放上攝氏300度嘅火山石板上，等客人自己隨心再燒到幾熟都得。另外，沙律、湯、白飯全部任裝，仲有圍裙提供，好貼心。

牛肩排 (180g)

180g嘅牛肩排可以話全餐廳性價比最高嘅牛肉，堂食只係需要$80。牛肩排嚟自美國，牛味十足，食落有少少筋不過就幾好咬口。建議可以配埋岩鹽或者黑椒汁一齊進食。

厚切牛舌

平時食開嘅牛舌好多時都係薄薄一片，呢度特意選擇厚切，有口感好多。3塊勁厚嘅手切牛舌，非常有嚼勁，簡單加少少岩鹽當調味已經好惹味。

亂切牛排(200g)

對於各位有選擇困難嘅朋友，望住個餐牌心大心細，個個部位都想試下嘅，叫呢個亂切牛排就啱晒，乜都有啲。西冷、牛柳、牛肩排同肉眼排都有，咁就無論肉汁重啲、肉味濃啲，抑或口感軟熟啲嘅牛牛，都可以一次過食勻喇。

日本A4和牛 (180g)

日本A4和牛一向都係各位牛魔嘅飛佛，石燒牛都一樣食到。而且唔似其他牛，呢款並唔會預先燒定，留畀客人完全自己控制生熟度。和牛來自岩手縣，油脂多，肉質又有彈性，而且厚度仲有返咁上下，啖啖滿足。

溶岩芝士牛排 (180g)

最新推出嘅溶岩芝士牛排，芝士控見到實變雙眼發光啦，混和咗車打芝士同mozzarella芝士製作嘅芝士溶岩漿，即場喺客人面前淋落塊牛扒度，直至塊扒被淹沒為止，夠晒澎湃。記住要快切嚟食啊，早切先有拉絲呀。

慢煮工業（太子）

肉食獸梗係要成餐啖啖肉，太子呢間扒房就啱晒，豬雞牛都有，而且主打慢煮菜式，保留到最多嘅肉汁，兼可以食到肉扒嘅原始味道！

極黑安格斯牛魔王肉眼

12安士嘅肉眼扒大大塊，肉色粉嫩。師傅更特意選用澳洲黑安格斯，大約100日大嘅穀飼牛，再以56度低溫慢煮，既可以鎖緊肉汁，亦使肉眼扒口感柔嫩鬆軟，肉味濃郁。

法式豬鞍扒

厚肉嘅豬鞍扒，選用豬肉味較濃，而豬膻味相對較少嘅西班牙黑毛豬。師傅為咗盡量保存原汁原味，更只係輕輕用咗香草、欖油同蒜頭醃製，並以52度低溫慢煮4個鐘。所以即使好厚身都唔會太韌，食落依然仲有豐富嘅肉汁。

美式芥末豬仔脾

豬仔脾本身已經係豬𦟌小骨中比較嫩滑嘅位置，再經過12小時嘅低溫慢煮，肉質自然非常腍身易食，間有筋肉紋理，所以又唔係完全得個腍字，會有唔同嘅口感呀。面層淋上嘅BBQ汁係自家調製嘅，加埋燒肉去熬出嚟㗎，可以話係由外到內到返外都係肉香。怕膩嘅話，建議可以加埋帶有微微煙燻味同酸味嘅黃芥末中和返。

法式油封鴨脾

呢道菜式嘅製作時間要超過一日呢~ 首先用香料、海鹽等醃製逾12個鐘，再用低溫油浸佢24個鐘，令鴨肉變得鬆軟，最後則以260度高溫焗熟，同時迫走油分。要做到外脆內軟，又唔多油膩嘅效果，係需要付出時間嘅。

經典威靈頓牛柳
傳統嘅威靈頓牛柳，好多都會加入鵝肝或者鴨肝醬製作，係就係好香，但油膩感同時都會好重。呢度就特別創作咗一款輕盈版，改用炒鮮菌同黑松露醬代替，油膩感減低咗，香味提昇咗，得咗。外層酥皮酥脆，富牛油香，包住嘅牛柳亦經慢煮處理過，份外嫩滑同juicy。

*以上圖片只供參考，所有食品以實物為準. 食品供應因餐廳而異