雅虎香港新聞 【飲食】五大好睇唔好食之應節食品
香港，作為美食之都，其中一個特色就係一年四季，幾時都食到唔同時節嘅美食，就算你新年想食月餅、清明想食年糕、聖誕想食糉都無難度，有求就有市。所以若果有嘅應節食品只係聖誕前後先至出現，你就知道呢款嘢好食極有限。不過一樣米養百樣人，總有（少部份）人甘之如飴期待呢個一期一會嘅應節嘢。以下幾款有無你心水呢？
聖誕布丁（Christmas pudding）
如果你有留意香港啲餅舖甜品店、高級超市，就會發現聖誕節尾聲賣剩最多嘅通常就係聖誕布丁。雖然唔少人會買個番屋企應節，但多數係為氣氛多過貪佢好食。其實外國家庭多數自製聖誕布丁應節，各家有自己家傳秘方之餘，通常會準備十三種材料，代表基督同埋十二門徒，製作過程已經係做節/感恩一部份。所以下次你想感受節日氣氛不妨自己親手做一個。
杏仁糕（Marzipan）
一字記之曰：甜。通常食完一啖即刻想問主人家有無試紙測糖尿。不過近年杏仁膏造型愈嚟愈精緻，由聖誕老人到小天使同BB要幾可愛有幾可愛，就算淨係用嚟做decoration都幾開心。
薑餅屋（Gingerbread Houses）
好靚，真係好靚，但食佢嫌麻煩、拆佢唔捨得、放多兩日又開始發霉，而且香港新一代豪宅都只得四百呎，反而薑餅人都有獨立屋住實在太令人心酸。所以都係留佢響餅店，影張相放上網呃吓like算啦。
烤火雞 （Roast Turkey）
焗火雞的確好有節日氣氛，可惜香港人有幾多個有咁大個焗爐？ 就算有又有幾何會焗原隻火雞？ 結果大家眼高手低焗到呢邊太熟太乾嗰邊又太生，想食烤得啱啱好嗰part仲緊張過抽聖誕禮物。
鹼漬魚（lutfisk）
有無試過呢款聖誕老人村「美食」？ 未食過？ 唔緊要，但我想話你知製作鹼漬魚過程要連續幾日浸透鹼液，所以烹調時唔可以用鋁製或銀質餐具，否則餐具會被腐蝕，可想而知味道有幾「特別」。食過呢樣，之前講過嗰啲都只算小兒科。
