首個個人演唱會開售個半鐘即賣爆 Gigi炎明熹答謝歌迷支持 宣布加開終極尾場

將於十月七日、假九龍灣國際展貿中心Star Hall舉行的《大家樂呈獻：炎明熹Gi-FORCE演唱會》，是Gigi炎明熹入行後首個個人售票演唱會，門票於今日早上十時公開發售，據知歌迷反應相當熱烈，在早上時段，雖然大約等十五分鐘左右便能夠順利地進入購票頁面，但未能成功付款，最終空手而回。而快達票網站，更於早上十一時半左右，在網頁顯示「全部售罄」字眼。

首個公售演出，就能夠得到廣大樂迷支持，當Gigi得悉這個喜訊後，難掩興奮心情，她說：「我前一晚仲緊張到瞓唔著，真係冇諗過反應咁好，開賣冇幾耐，我已經不斷收到歌迷喺社交網站私訊我話買唔到飛，好唔開心。」

歌迷一票難求，黃牛黨更「趁火打劫」，聲稱手握前排靚位門票，要求私訊了解詳情及售價，非常猖狂。

出名痛錫歌迷的Gigi，第一時間向公司反映問題，擔心歌迷為了支持自己，不惜向黃牛黨買炒價飛。有見及此，主辦單位亦迅速採取應變措施，決定加開10月8日終極尾場，希望可以舒緩炒飛問題。

「之前睇啲前輩歌手開演唱會嘅報道，會煩惱歌迷買唔到飛，又會心痛佢哋幫襯黃牛黨，而家我終於身同感受，好多謝公司配合，好快就應承加多一場，但因為場地問題，唔可以再加。我想喺度呼籲我嘅歌迷，真係唔好幫襯黃牛黨，希望加場之後，大家都可以買到飛。」

Gigi坦言，雖然決定加場後，令自己的壓力大增，但為了答謝歌迷，將會盡最大努力，好好完成兩場演唱會。

「正如我前日喺記者會上講，只要我攞起支咪，就會珍惜每一次演出，唱好每一首歌，為咗多謝歌迷嘅支持，我會雙倍俾心機。」Gigi感激地說。

《大家樂呈獻：炎明熹Gi-FORCE演唱會》，10月8日加場的門票，將於今日下午二時開售，一眾粉絲可以把握最後撲飛機會。

《大家樂呈獻：炎明熹Gi-FORCE演唱會》資料：

地點：九龍灣國際展貿中心Star Hall

日期：10月7日、8 日（星期六及日）

時間：8:15PM

票價：$880、$680、$480

購票熱線：Ticket Purchase Hotline 31288288

網上購票：www.hkticketing.com