【香港有條車仔麵街？】 蘇杭街 4大車仔麵店比拼！

車仔麵成日食，到底全港邊區最多車仔麵舖？小記未做過調查，唔敢亂講。但係上環人都知，短短一條蘇杭街，就有4間車仔麵舖之多！稱為「車仔麵街」絕對唔過份。而且4間口碑都不錯，今次一於試下，分分高低！

第一站「車仔麵專家」。4間車仔麵舖中最新開，論設計是4者之冠。店外的壁畫找了著名漫畫家甘小文操刀，仔細睇睇，原來係林鄭、John Tsang、葉劉、連碧咸夫婦及「侵侵」都有，幾有心思。(a)

店面不像傳統車仔麵舖，木色枱櫈，夠光猛之餘。牆上放了星戰玩具擺設，唔講以為係café！店員服務態度都勤快，抵讚。(a)

5餸車仔麵 $ 49。這裡的車仔麵餸約$6-10/款，其實三四十蚊就已經好大碗。圖中有時菜、紅腸、冬菇、菜肉餃、魷魚、腩汁及河粉(中)。當中咖喱魷魚及菜肉餃是必叫。(a)

咖喱魷魚爽口，大塊，卻唔會過韌，只略嫌咖喱唔夠香。冬菇超入味！軟腍好嚼。紅腸炸過，比平時吃到的略略脆口。不過未知是否幫襯時間是lunch time過後，整碗河粉都碎濕濕，要用匙先食到，扣分。(a)

第二站「車仔麵世家」於中環另有分店，一到lunch time就見人龍。但整體而言，看門面及店員都只屬一般。(b)

4餸車仔麵 $45。用碟承麵，拿回座位更易。圖中有酸齋、豬紅、雞翼尖及炸春卷，但先要讚腩湯底，甜甜地唔覺有味精，好飲！(b)

雞翼尖滑而入味，好好啜；豬紅中規中矩；酸齋都好吃，但最正係炸春卷！雖然唔係即炸，但都微微脆口，蘸少少辣油無得彈。(b)

第三站「90后車仔麵&糖水」，店名已經講咗，這裡一大特色就係將車仔麵match糖水。(c )

3餸麵+糖水 $45(下午茶)。響鈴卷、龍蝦丸、紫菜及銀針粉。這裡的車仔麵有瀨粉及銀針粉可揀，瀨粉好搶手，lunch晏少少就賣哂。銀針粉唔算好滑，勝在煙煙韌韌，紫菜索了湯更好吃。不過湯底略清淡，唔太夠味。(c )

條條完整的銀針粉，索了湯汁，又幾好味。(c )

糖水唔馬虎，共有6款可揀。蕃薯糖水足料！蕃薯又腍又甜，如果可以減少少甜就更好。(c )

第四站「麵尊」，車仔麵界的名牌，經常被選為「必吃車仔麵」之一。每日lunch time就見人龍。(d)

4餸車仔麵 $45 (咖喱魷魚+炸魚皮+蘿蔔+油麵)。落單後，等待上枱時間在4間中最長。不過一咬魚皮就值回票價，十級脆口！咯咯脆，帶少少油香，正！(d)

小店有太多「必叫」，咖喱魷魚的咖喱味唔算好濃，不過無渣亦幾爽彈；蘿蔔入哂味，好甜！咖喱魚蛋大大粒，彈牙，飲返啖豆漿，又平又正。(d)

Shop Info
a/車仔麵專家
地址：上環蘇杭街104號秀平商業大廈地舖

b/車仔麵世家
地址：上環蘇杭街82號地下(2543 5231)

c/ 90后車仔面
地址：上環蘇杭街97號地下(2983 0266)

d/ 麵尊
地址：上環蘇杭街22-24號1號舖 (2851 0626)