香港秘密搜查官｜Mike導新作探索「香港秘密」 網民讚認真做無聊事

ViuTV節目《香港秘密搜查官》由《花姐ERROR遊》及《ERROR自肥企画》幕後團隊「無制限OT編集団」製作，並由陳漢娜（Hanna）、徐㴓喬（Asha）及P1X3L成員葉振弘（Marco）主持，擔任「搜查官」，主持組合新鮮亦具一定人氣，加上探索UFO、特異功能及尋找野生鹿等「香港秘密」嘅題材偏門，網民喺節目未播出時已期待Mike導新搞作。《香港秘密搜查官》噚晚（1日）已播出首集，有唔少觀眾睇完都畀讚。

《香港秘密搜查官》由郊外走入市區，涉及唔少爬山、跳海場口，仲新設「陷阱攝影機」及「浮力補償裝備」，就連Asha都形容成個拍攝過程好驚險，笑指：「冒險程度是110！」三位搜查官喺第一集入面接受首項秘密任務，以超過60米深長嘅繩駁住深海拍攝設備「#亞特蘭提斯人」放落水深海圖顯示為44米深嘅維港入面，探索維港水底到底有啲乜。

網民就喺ViuTV官方FB留言指睇到好緊張：「唔知點解可以有熱血嘅感覺，唔知點解會睇到好緊張」、「開頭睇有啲擔心，真係唔知做啲咩，但最後真係睇到好緊張，緊張個道具多過探海港水深」等等，仲有唔少網民大讚Mike導製作用心，令更多人認識香港不為人知嘅一面：「Mike導d 節目真係好正，唔係hea介紹香港，好用心，估你唔到」、「Mike導出品必有深刻意義，第1集探索維港最深水深處海底身為地道香港人，真係無乜機會會知道」、「認真做無聊事，好正」。另外，亦有網民指自己成晚都黐住ViuTV，睇完《香港秘密搜查官》首集播出已期待嚟緊嘅集數。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！