香港金曲頒獎典禮︳負評數多過出席歌手 衰在咩原因?

香港金曲獎︳負評多過出席歌手 衰在咩原因?
香港金曲獎︳負評多過出席歌手 衰在咩原因?

港台同TVB首度合辦嘅《香港金曲頒獎典禮2021/2022》尋晚舉行。本來將《十大中文金曲》同《勁歌金曲頒獎典禮》合併舉行,理應大有睇頭,但係網友負評多過出席歌手人數,甚至唔少人都係上fb見有人鬧先知有個咁嘅show。綜觀成個頒獎禮,死因喺邊?

越想有權威 越蒼白無力

大會有晒選舉準則,各位可以自己參考。但係得出嘅結果,又係咪好有權威性?「全球華人至尊金曲獎」係《日出前讓街燈安睡》,你可以問下身邊嘅全球華人(而家大家都好多「說了再見就會再見」嘅全球華人朋友啦),有幾多個認同?有音樂平台近年搞嘅頒獎禮,冇人過問機制,但係亦冇人對什麼風雲歌手名單有幾多意見,因為根本唔重要,人地個show好睇好多。不如一係搞好個show,一係就公公正正科學化咁做一個嚴謹嘅大型音樂民調,唔好兩頭唔到岸啦。

樂壇好多新面孔 通通唱舊歌

香港金曲獎︳負評多過出席歌手 衰在咩原因?
香港金曲獎︳負評多過出席歌手 衰在咩原因?

開場嘉賓係劉德華,而17歲嘅炎明熹要唱面世37年嘅《愛情陷阱》,表演環節成個氣氛同近年香港流行樂壇嘅多元化同年輕化背道而馳。如果劉德華唱《真話的清高》,唱成點我都真心respect喎反而。驚長輩觀眾唔識《真話的清高》?喂喂喂《真》唔係獲得香港金曲金曲獎咩?唔家傳戶曉都街知巷聞啦,唔係架咩?

司儀份稿 _ _ _ _

香港金曲獎︳負評多過出席歌手 衰在咩原因?
香港金曲獎︳負評多過出席歌手 衰在咩原因?

李志剛介紹泳兒得獎歌曲《荊棘海》時話「泳兒全名叫游泳健兒,荊棘海又點會難到佢呢」。唔知係咪writer嘅手筆?如果係特登搞個咁嘅「硬tag」換取社交媒體迴響,我反而比較欣賞。但……

點解咁多歌手缺席?

唔使俾面你囉因為。冇到嘅MIRROR,十二場紅館。冇到嘅林家謙,六場紅館。冇到嘅衛蘭,三場紅館。獎都冇嘅周國賢,又係三場紅館。有邊個係因為TVB同港台而換到一班肯真金白銀俾錢睇你嘅歌迷?冇喎。喂,化妝set頭都要錢架,節儉是美德呀。去到張敬軒呢種有咁上下級數,有期咪唔介意現身囉,一日最衰新冠啫。

曾志偉希望金曲獎似金像獎

一個係由業界組織投選出來嘅獎項,一個係由商業機構同政府機關合辦,真係可以相提並論?假如曾總經理希望同台灣金曲獎睇齊都仲好啲,不過咁喎 - 人地今年嘅司儀羅時豐大哥,縱橫歌壇多年,五十幾歲操出六塊肌。香港,可以搵邊位?近年李志剛好似都操得幾爆吓噃。

香港金曲獎︳負評多過出席歌手 衰在咩原因?
香港金曲獎︳負評多過出席歌手 衰在咩原因?

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能