香港5大日式丼飯推介 中環廚師發辦魚生飯、風味濃郁鵝肝和牛丼

鍾意食日本嘢嘅香港人，應該無幾多個抗拒到鮮甜味美嘅魚生丼飯！魚生飯嘅選擇有咁多，究竟邊間最啱你心水呢？今期搜羅5間各有特色嘅日式丼飯專門店畀大家，由深水埗小店到omakase魚生飯都有～

三種食法魚生飯 宗像屋

一間位於深水埗嘅魚生飯小店，經常都會有人大排長龍就知佢深藏不露喇～Menu好簡單只係得4款選擇，分別係梅、竹、松同特上，基本款嘅梅有吞拿魚、油甘魚同三文魚籽等，夠鮮甜嘅關係簡簡單單配上日本豉油同珍珠米已經好滿足。豪華啲嘅特上除咗基本魚類，仲有蟹肉同海膽，每一啖都係享受～最特別係店舖有魚生飯三食，就咁食、包紫菜食同茶漬飯，咁就一款飯可以享受到唔同嘅味道喇。

人氣日式海鮮丼店 爆丼屋

旺角超人氣嘅日式海鮮丼店，最出名係佢魚生飯嘅份量夠晒澎湃，見到滿滿一碗真係令人心情愉悅呀～必食招牌超份量三重大極上丼，大量粉紅色嘅拖羅覆蓋住飯，然後再加上海膽同大量蟹肉，拖羅油脂豐富入口即溶，海膽都好鮮甜無怪味，而蟹肉又為個飯添上一絲鮮甜。鍾意香啲嘅推介火焰盛丼，三文魚、帆立貝、松茶蟹柳、左口魚裙邊都經過火炙，迫出魚生嘅魚油，撈埋飯食更正！

貝三味丼飯 嵐橋丼飯專門店

想試吓新口味嘅，可以考慮吓呢間丼飯專門店。除咗魚類丼飯，呢度都供應少見嘅喜之次、赤睦、鮑魚、日本象拔蚌及北寄貝等海鮮，好推薦喜之次丼，材料包括喜之次、油甘魚、三文魚、韓國海膽、金目鯛、日本牡丹蝦、松葉蟹肉及三文魚籽。喜之次嘅魚皮經火炙燒香，油香都完全滲透出嚟，非常加分。貝三味丼包括日本象拔蚌、北寄貝、帆立貝、蔥呑拿魚蓉、三文魚籽、蟹鉗，象拔蚌同北寄貝都爽口而不靭，令人滿足。

鵝肝和牛丼 スーパー丼

如果食唔到生嘢嘅，呢間丼飯就啱你喇～人氣鵝肝和牛丼，油炸處理過嘅鵝肝入口即溶，配埋脂香豐富嘅和牛片真係無得輸，係好香嘅鵝油同牛脂香，加埋醃菜食又可以減低油膩感。醬燒廣島蠔丼選用廣島蠔，大隻得嚟燒得好入味同埋勁多汁，一上枱已經聞到好香，加上茄子同木魚碎簡直係完美。

廚師發辦魚生飯 海言どんぶり専門店

高級版嘅日式丼飯，皆因佢係以Omakase嘅形式呈上，想食記得要預約呀。廚師發辦魚生飯套餐包括沙律、茶碗蒸、15-17款時令刺身丼飯及麵豉湯，包括季節限定及時令款式，如海膽、三文魚籽、香箱蟹、秋刀魚、太刀魚、石班、鰤魚、鯖魚、中拖羅、大拖羅、粒貝、赤海蝦、鮟鱇魚肝、沙甸魚苗、白子、燒拖羅及北寄貝，每款都新鮮鮮甜，魚肉爽彈滑口，價錢貴少少都值得。

文: Yanica