【馬德鐘個仔】馬在驤繼承老豆男神衣鉢 5大屈機條件成最強星二代

TVB新劇《我家無難事》日前開鏡，劇集矚目之處除咗有早前懷疑酒後駕駛出事嘅楊明參演之外，男主角馬德鐘嘅囝囝馬在驤首次拍劇，飾演老豆嘅年青時代。自從傳媒發現馬在驤盡得馬德鐘高大身型同俊俏外表之後，大家都期待佢幾時入行。而馬在驤亦已經簽約邵氏，似乎準備就緒繼承老豆衣鉢。

星二代唔一定贏在起跑線，但係以馬在驤嘅條件，又的確難以匹敵。

阿爸係「馬神」 阿媽係博士

馬在驤老豆馬德鐘入電視台之前係警察，曾經調任飛虎隊及保護要員組，更負責貼身訪港嘅英國王妃戴安娜，90年代做過兼職模特兒，因而被TVB相中。「馬神」做過多套劇集男主角，試過8次獲提名「萬千星輝頒獎典禮」嘅「最佳男主角」，2018年終於憑《跳躍生命線》榮膺視帝。

馬在驤媽咪、馬德鐘太太張筱蘭更加大有來頭！張筱蘭(Karen)係老年研究學者，喺科大取得博士學位，進修期間誕下馬在驤，於是帶埋個仔拎住獎學金去歐洲讀書，好犀利！而家Karen係港大秀圃老年研究中心名譽研究員以及社會工作及社會行政學系名譽助理教授。Karen讀書得之餘，亦曾經做過模特兒，同期有琦琦、馬詩慧、周汶錡、楊崢等等。

學界「水怪」

「馬神」曾經係排球隊成員，馬在驤盡得運動基因嘅遺傳，主力游泳項目，試過喺國際學校讀書期間嘅泳賽贏得7面金牌。即使去到澳洲讀書，都加入大學校隊，仲喺著名嘅Bondi Beach做救生員，成為真正「六舊腹肌拯救隊」成員。

女友係奧運級游泳選手

馬在驤喺IG Post出同女友Marissa合照，原來Marissa都係泳隊中人，而且仲有資格競逐東京奧運入場券，但因為疫情而未能作賽，而家留喺澳洲同馬在驤分隔兩地。

19歲做model行 Hermes show

父母都做過模特兒，加上身型高大，行上「天橋」只係遲早嘅事！2017年，19歲嘅馬在驤就參與Hermes香港嘅fashion show，之後亦有接其他拍攝工作。

爆肌＋190cm身型

仲要介紹咩？睇相啦！