馮盈盈拜師譚嘉儀 請食Tea當學費

東方日報
·2 分鐘文章
馮盈盈(右)跟譚嘉儀學唱歌,獲讚有潛質。
馮盈盈(右)跟譚嘉儀學唱歌,獲讚有潛質。

「魔音」馮盈盈向唱得之人譚嘉儀拜師學藝,獲讚有潛質,她希望可以從谷底翻身!對於好姊妹麥明詩復出拍AMM網劇,她不覺雙方打對台!

馮盈盈、譚嘉儀、陳自瑤、戴祖儀、姚子羚、劉佩玥及張振朗等,昨日到電視城出席《好聲好戲》記者會,盈盈之前在《開心大綜藝》唱歌走音,要向嘉儀拜師學唱歌,嘉儀笑說:「我梗係收佢啦!我聽過佢唱歌,其實佢非常有潛質,把聲夠響,絕對有得改善。」盈盈開心說:「第一次有人咁讚我,我哋約咗下個禮拜學唱歌,希望拍低過程,睇到我由谷底進步,化枯木為神奇!」嘉儀自言不會鬧學生,又指盈盈不難教,對她有信心,盈盈即笑說:「好感動,佢畀咁多正能量鼓勵我,令我充滿信心,又唔收我學費,我請佢食番餐下午茶。」

歡迎麥明詩對撼

對於好友麥明詩復出拍AMM網劇,問盈盈可有聽對方提及此事?她說:「冇特別提起。(同你打對台?)唔係,任何電視台、平台都唔係對手、敵對,我哋都係想為香港娛樂事業出一分力,一齊做大個餅。(想出去試吓?)咩工作機會都歡迎,但要搵我經理人傾。(平時有聯絡?交流演戲心得?)有Keep住聯絡,我邊有演戲心得可以交流,我哋會交流其他方面。」

陳自瑤避談老公

至於陳自瑤表示參加此節目很緊張:「入行咁多年都冇試過真正比賽,真係緊張到嘔,完咗之後仲生咗粒好大嘅壓力瘡。」對於汪明荃在台上讚她好戲,提議開劇給她做女主角,她笑說:「好開心,雖然唔知會唔會實現,但已得到好好嘅鼓勵。」談及日前為囡囡慶祝生日,但不見老公王浩信,她避談說:「每次都係我準備同布置,令佢開心。」

而戴祖儀日前被整蠱,被假扮食環署的工作人員指太多人聚集,又殺出假記者,她說:「記者嚟到影低,心諗水洗都唔清,嗰陣仲諗報道出嚟之後,我應該返馬來西亞定去美國玩吓先,好驚唔知點解釋,知道真相嗰陣開心到腳軟!」

戴祖儀晒長腿兼畀心心,青春無敵!
戴祖儀晒長腿兼畀心心,青春無敵!