馮素波自爆曾被記者不禮貌對待霸氣反擊：竟然叫我哋幾個老嘢行開喎

資深藝人馮素波（波姐）雖然佢年屆79歲，但心境越活越年輕，仍緊貼潮流，積極經營社交平台和YouTube頻道，近期更進駐「小紅書」，邀請唔少圈中好友分享過往嘅拍劇點滴，好似最近佢就邀請咗陶大宇做嘉賓，期間波姐仲自爆曾經被記者歧視。

馮素波出身於演藝世家，當年以童星身份出道，縱橫演藝圈超過70年，演技毋庸置疑，同時深受後輩敬重，但估唔到佢都試過被記者不禮貌對待。喺影片中，波姐就話喺演員影大合照時被叫「行開啲」：「個記者叫我『你行開啲呀』，要影你哋幾個，我企喺旁邊影相，第二日出咗嚟啲娛樂報就cut咗我嘅，就冇我喺度嘅。至到你哋《壹號皇庭》呢，嗰個記者叫我行開，净係影你哋，嗰陣時我就夠膽講下嘢，我話我而家係做緊工作，今日係記招宣傳，你畀我影完呢張大合照呢，你叫我企埋嚟我都唔企，你哋慢慢影啦！」

波姐仲話當時係一位年輕女記者，至於名稱佢就已經唔記得，但佢對事件依然耿耿於懷，因為「竟然叫我哋幾個老嘢行開喎，真係冇禮貌！我話而家影大合照，我哋嚟做宣傳嘅，我同公司開工呀，影完張大合照你鍾意我哋行幾遠都得。」之後，陶大宇就安慰佢話：「就算真係要行開，都係嗰個態度同語氣問題。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！