【驚恐症別怕】唔止李珊珊受困擾 馬浚偉得病二十年 周潤發壓力大一度患病

受驚恐症糾纏多年嘅李珊珊，喺商台新節目《自在想》分享患病經歷，憶述患病初期病癥如呼吸困難、心跳加速等，後來遇到精神科醫生先知道病因。珊珊提到得病同自己性格硬淨有關，加上娛圈壓力大，負面情緒太多終於爆發。

娛圈的確係壓力煲，所以唔少藝人都曾經得過情緒病，淨係驚恐症都已經有好幾位。希望佢地嘅經歷同應對方式，可以令受困擾嘅你帶來一點啟發。

周潤發為打入荷里活壓力過大

成日行山又同街坊自拍嘅發哥周潤發，睇落充滿正能量，原來都試過患上驚恐症。發哥多年前撰文，提到20年前拍完李安導演嘅《卧虎藏龍》之後，成日出現失眠、呼吸困難、標冷汗等癥狀，睇過好多醫生都搵唔到咩事。後來發哥睇心理醫生，先知係驚恐症，佢憶述話可能係當時進軍荷李活，對自己太高要求引致壓力過大導致血清素失調。發哥後來學會放鬆心情，定期見醫生並且服藥，3個月後情況好轉。

李亞男獨守空房得病 祖藍唔拍劇陪老婆

近年王祖藍喺內地吃得開，但亦因為咁令太太經常一個人喺香港，導致情緒出現問題，2017年亞男更出現驚恐症癥狀而入院。祖藍憶述當時亞男只係飲少少酒同咖啡，之後就心跳加速兼全身抽筋，仲以為太太會死！祖藍知悉狀況後決定減產，唔拍電視劇只係接綜藝節目，出埠做嘢唔會超過3個月，盡量留喺香港陪老婆。

馬浚偉抗病20年

曾經効力大台多年嘅馬仔，呢廿幾年嚟都係同情緒病戰鬥緊。1999年馬仔媽媽離世，佢因此患上抑鬱症同驚恐症，至今發病過千次，會心跳手震甚至暈倒，試過打緊羽毛球都會發作瞓喺地下，而家都要帶定藥喺身控制突發情況。因此馬仔對於李珊珊嘅情況好理解，並且話會嘗試同呢個病共存，仲慶幸呢個病唔會攞命。

韓馬利搵臨床心理學家打救

Mary姐前年喺TVB節目《不老傳說》自揭患驚恐症經歷，佢話有次食飯嗰陣感到窒息、驚慌、抖唔到氣等典型狀況，後來連沖涼都唔得，甚至有幻聽，最後要搵臨床心理學家求助。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！