高官大忌：拉頭馬

【星島日報報道】周三賽馬，第六場跑「警察盃」，賽後一哥盧偉聰聯同「篤定」下任一哥的鄧炳強，兩對夫婦頒獎畀頭馬「喜蓮彩星」馬主胡家驃、練馬師約翰摩亞及騎師潘頓。 點解全香港政府部門，只得警務處有特別盃賽度身訂造呢？怕且要《歲月如流話香江》專家先知 ！今天，小弟只想講講高官與跑馬。 前兩個月，有某高官在賽馬日發短訊給我：「嘩！呢幾丁大Sir（某紀律部隊）有冇搞錯呀，竟然興奮到噬起棚牙傍住馬主拉頭馬？」點解咁講？因政府有幾個部門，負責執法（警務處、海關、消防處、入境處、屋宇署 …），另有幾個則工作與各大財團利益息息相關（規劃署、建築署、律政署、環保署、民航處、地政總署）。古有明訓，任何坐擁公家權力者，都會有商家千方百計影響佢，從而希望得到競爭對手沒有的優待、資訊及關係。所以，公職人員，愈高級，愈是「Bound to be corrupted」。這是基本常識，難道你做得高官，IQ低到以為一眾富豪天生喜歡巴結你、真心想與你做朋友？ 對！高官基於社交，經常有馬主或馬會董事請入場，實在不宜拒人千里。但請記住，必須顧及公眾及同事的觀感。兩樣 切忌做：第一，畀人爛賭及豪賭感覺，只可小注怡情。最好用手機低調下注；第二，切忌太張揚太招搖，無論與馬主朋友多好關係，都要保持距離，尤其不要與馬主在眾目睽睽及電視直播鏡頭下拉頭馬。因為被錄低的話，日後不知幾時會畀人用來「隊」你！江湖凶險，富豪馬主可能最大目的是畀全世界知——我與某某高官攬頭攬頸 ！如此，你就不知不覺被借個膊頭重重一用，變成胡國興大法官口頭禪：你好惡睇（俗稱樣衰！）囉。 早年，有唱片公司老闆邀約入馬場，小弟一口拒絕，並勸同事千萬不要去。對方反應：「乜做電台DJ冇社交及賭馬自由 咩？」我說：「唔該你用下個腦，若連應該做乜、唔應該做乜都無法分辨，閣下必定前途似『咁』！」 曾智華 專欄