麥明詩同屆港姐亞軍 龐卓欣網上受騙3日唔見7萬蚊 自嘆「真係蠢咗」

網上騙案有幾易中招？近年成為Youtuber嘅2015年港姐亞軍龐卓欣(Ada)，高學歷又有個投資專家阿爸，都一樣中招，3日唔見7萬蚊！Ada特意拍片講述經過警惕大家，並且自嘆「真係蠢咗」。

Ada憶述早前收到自稱中介公司傳whatsapp短訊，叫佢去做一份「遙距工作」，就係去一個叫Clickbank嘅網站每日評論45件產品，每做夠30日就可以得到24000蚊底薪。由於多年前Ada真係接觸過呢間公司，所以起初放下戒心。登記之後，騙徒叫Ada登上嘅Clickbank網站，同網上搜尋到嗰個完全唔同，騙徒就話係「員工版」。而騙徒提出Ada要先俾按金，話係避免有人濫用，而且之後會連同佣金退返。

龐卓欣表示騙徒起初真係將酬勞同按金退返晒俾佢，而且又有抽獎令佢賺更多佣金，咁「好彩」Ada次次都「中獎」，但俾嘅按金亦越來越多。到第3日，Ada發現自己不停「中獎」，但存入嘅按金同樣增加，先至驚覺「中招」，於是打去銀行要求停止過數。但係銀行話用網上話數啲錢好快被轉走，基本上追唔返。

Ada決定去灣仔警署報警，但原來警察收到唔少求助，Ada呢單已經係警署單日接到嘅第11單，佢損失嘅7萬蚊金額算係細。警察同佢講好難追討，而且損失要夠10萬以上「先會做到嘢」。Ada仲話落口供嗰陣，警察同佢講「有人剛剛被人呃咗1千萬」！7萬蚊換來教訓，Ada自言「我知道真係蠢咗嘅，點解人哋搵我做嘢，我要過錢呢？呢個已經唔make sense」。

龐卓欣2015年參加港姐，被視為熱門之一，佢爸爸龐寶林係知名証券界人士。最後Ada得到亞軍，輸比中小學時一齊讀女拔萃嘅勁敵麥明詩。Ada參選後冇加入TVB，轉型做音樂老師及Youtuber，而佢同金融界男友Patrick亦不時網上放閃。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！