黃美棋答應鍾健威求婚「用我嘅餘生去繼續煩死你」

童星出身嘅「美棋BB」黃美棋唔覺唔覺都就快34歲，尋晚佢喺IG發文宣布，明年升呢成為鍾太！

星期五生日嘅黃美棋，男友鍾健威(Ray)日前為女友準備驚喜生日派對，call齊朋友同家人到賀之餘，仲安排求婚儀式！唔少圈中好友如楊潮凱、林秀怡、林奕匡同太太李靄璣及朱智賢等都有到場。其實美棋同Ray之前受訪都提過有意結婚，而家有埋求婚儀式就可以公告天下。而黃美棋亦都寫咗篇長文感謝未婚夫，sweet到呢～

黃美棋4歲被星探發掘入行拍廣告，後來加入TVB成為小演員，拍過《刑事偵緝檔案》、《真情》等劇集，並且參演周星馳電影《行運一條龍》飾演小芬女。長大後黃美棋減少演出，讀完中學就去咗美國讀書，期間返港放暑假同朋友影嘅相被網友share而成為話題。黃美棋畢業後做過一年OL，但係發現唔喜歡朝九晚五，於是加入HKTV，2015年約滿後曾以自由身發展，到2017年重返TVB，2年前更簽埋經理人合約成為「親生女」。

至於美棋未婚夫鍾健威喺有線擔任主持多年，二人因為拍旅遊節目而認識，值得一提係Ray同《中年好聲音》冠軍周吉佩係樂隊sp’ACE隊友，而Ray離開電視台之後主力做司儀，因此疫情期間活動同婚禮都停辦，令Ray手停口停陷入低潮，甚至爭啲要同美棋分手。好在後來Ray讀完領袖課程對人生改觀，同女友關係亦都好轉。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！