黑色月光｜與胡定欣主演劇集同期硬撼 楊茜堯親解不和傳聞真相

由楊茜堯（原名：楊怡）主演嘅《黑色月光》及由胡定欣主演嘅《巾幗梟雄之懸崖》同為今年TVB嘅台慶劇，並分別係本月28日及21日首播。兩位視后都有劇集輪住出街，不禁令網民聯想起二人喺《萬千星輝頒獎典禮2010》疑似不和嘅傳聞。喺噚日（22日 ），楊茜堯連同劇中演員出席宣傳活動為劇集造勢，期間楊茜堯接受傳媒訪問親揭呢個多年不和傳聞嘅真相。佢表示自己從來冇解釋過，佢記得事件發生第二日起身，呢條片喺社交平台被洗版式瘋傳，佢就即刻發信息俾胡定欣話：「定欣咩事呀？ 」而胡定欣就回答話唔知，唔需要理佢哋。

之後，楊茜堯表示記得當年徐子珊坐喺左邊，而胡定欣就坐喺佢右邊，跟住徐子珊同佢講好凍，咁佢就回答話：「係咩？好凍咩？」楊茜堯喺同徐子珊對話時，佢有配合手部動作，所以被影出嚟時被誤以為藐視及批踭定欣。楊茜堯指認識佢嘅人就會知佢唔會批踭，所以佢覺得傳出不和係好搞笑，佢仲話同胡定欣係好朋友嚟。

楊茜堯及胡定欣貴為視后，演技可以話係毋庸置疑，所以二人都被視為今屆視后大熱人選，楊茜堯就話係每個演員都付出100分努力，大家係良性競爭，佢亦會捧定欣場。認識佢嘅人就會知道佢對獎項抱住隨緣嘅心態，唔會諗得太多，每一個角色都會俾心機做好。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！