點解可以keep得咁好 黎姿樣貌身材廿年冇變過

雖然而家周街都係「女神」，不過喺好多人心目中，真正嘅女神只得一個，佢就係黎姿 （Gigi，現已改名為黎珈而） 。黎姿由21歲喺電影 《倚天屠龍記之魔教教主》飾演周芷若、25歲喺電影《古惑仔》系列飾演細細粒、去到33歲喺無綫劇集 《金枝慾孽》 嘅玉瑩小主、再去到而家45歲做咗人妻兼上市公司主席，無論樣貌身材都冇變過。雖然佢唔似其他「美魔女」或者「宅男女神」咁經常晒三點式同身材，不過佢嘅氣質都好容易滲晒出來。

《倚天屠龍記之魔教教主》周芷若

《古惑仔》系列細細粒

《金枝慾孽》 玉瑩小主

其實除咗樣靚，作為女神，心當然都要靚。有傳當年為咗養家，黎姿將讀書嘅機會俾咗細佬，自己入娛樂圈賺錢。後來佢喺演藝界終於捱出頭，又等到細佬黎嬰念完七年醫科大學返香港，諗住可以有好日子過嘅時候，點知細佬就遇上嚴重車禍，差啲命都無。當時黎姿即刻拋低手上所有工作，唔嫌辛苦咁日日去醫院照顧細佬，可見佢有幾重視家庭。

之後佢就喺07年棄影從商，接手細佬黎嬰創立嘅醫學美容公司到依家近十年。最近佢成功將公司喺港交所創業板上市，仲話係要「延續細佬嘅精神」，身家一日暴升至5.93億元。

所以話黎姿樣靚、心靚、又能事業家庭兩兼顧，可以話係女神嘅典範。