龔嘉欣《愛情》得意 拍續集「后」勁凌厲

東方日報
·3 分鐘文章
人氣急升的龔嘉欣被重提緋聞,坦言名單中冇個真!
人氣急升的龔嘉欣被重提緋聞,坦言名單中冇個真!

龔嘉欣與羅天宇在《香港愛情故事》演活年輕人「上車」悲歌,收視三級跳下獲公司拍板開續集,無綫高層杜之克揚言新一輯題材講失業將更煽情!頒獎禮前扑槌開續集,令龔嘉欣爭視后之勢更盛!

由龔嘉欣、羅天宇、謝東閔與游嘉欣等主演的熱爆劇《香港愛情故事》叫好叫座,無綫乘勝狙擊,打算原班底開拍續集!新一輯由「上車」買樓的話題,改為今年大家最擔心的失業問題,皆因新冠肺炎疫情打擊下,各行各業面臨倒閉危機,打工仔陷水深火熱,故續集內容將會更加煽情!據知,曾揚言床戲與咀戲已到底線的女主角龔嘉欣,續集將挑戰更激場面。

講失業問題 更加煽情

《愛》劇獲外界大回響,無綫副總經理杜之克昨日受訪時坦言對開拍續集加添信心:「喺myTV SUPER嘅收看數據直線上升,氣勢好勁,直情係三級跳!」由於劇集風格以大家有共鳴的民生問題為主,無綫決定打造「香港3部曲」,首輯講買樓問題,續集將會講失業,第3輯則會關於飲食,暫定每輯為12至15集,於今年第2季開拍。續集以失業為主題,內容環繞疫情後年輕人不單止無錢「上車」,更要面對冇工開手停口停,劇中角色為生活不惜豁出去,貼地之餘還帶煽情!相信觀眾都期待為「搞嘢」由時鐘酒店「大戰」到太空艙的龔嘉欣與羅天宇,在新一輯可以去到幾盡。

去年有4劇播出的龔嘉欣,憑《殺手》衝擊視后,加上《愛》劇「戲」勢如虹下開續集,她昨日受訪時坦言開心:「作為演員,第一輯有咁好嘅成績,當然開心!自己對班底、監製同公司嘅創作都好信任,所以都好期待!(氣勢咁勁,分分鐘助你今年贏埋視后?)係嘅咩?舊年我有4套劇集出街已經好開心,最滿足係觀眾鍾意我演嘅角色,對自己嘅期望都會更加高,以後一定要做得更加好。」

至於男主角羅天宇被問到將開續集,他說:「如果係真嘅梗係開心啦!我都好心急想知道之後劇本係點樣行,每一個角色感情、事業會發展成點。如果再拍,我會更加做足準備,希望比之前做得更好,唔想令大家失望。」目前正忙拍另一新劇的監製林肯,談及《愛》開續集時說:「細節我哋都仲未認真去傾,觀眾之前反應咁好當然開心,希望之後唔同嘅題材,大家都會一樣鍾意。」

呻緋聞男友冇個真

另外,龔嘉欣日前接受電台訪問,入行12年贏過「最佳女配角」獎外,還曾被冠以「緋聞女王」稱號。她當年跟鄧健泓分手後,先後與周國賢、許家傑、關楚耀、沈震軒、張振朗及吳業坤等傳緋聞,她對此說:「以前細個唔識,但年紀大啲就覺得必須講清楚,緋聞名單中冇個真!」其中最嬲是跟周國賢拍旅遊節目時,被傳拍對方房門:「佢都話知道係邊個做,嗰次根本唔係我!點解出嚟變咗係我呢?呢件事好離譜,係無中生有,大家都可以問番周國賢!」

龔嘉欣與羅天宇在劇中連場肉搏,續集將挑戰更激場面!
龔嘉欣與羅天宇在劇中連場肉搏,續集將挑戰更激場面!
龔嘉欣去年4劇大爆發,憑《殺手》提名視后。
龔嘉欣去年4劇大爆發,憑《殺手》提名視后。