【10歲訪問片出土】林穎彤陪母行乞:諗唔到係咁養我

·2 分鐘文章
【10歲訪問片出土】林穎彤陪母行乞:諗唔到係咁養我
【10歲訪問片出土】林穎彤陪母行乞:諗唔到係咁養我

藝人林穎彤(Bella)曾經歷悲慘童年,1歲多時遭生父拋棄,林母獨自撫養兩個女兒,在巨大經濟壓力下,無計可施,抱着Bella行乞度日。Bella十歲時成為童星,憑亞視劇集《萬家燈火》而為人認識,當時她與媽媽亮相藝人鮑起靜主持的電視節目親述身世,而這段18年前的片段近日網上瘋傳。

片中Bella與媽媽重返曾行乞的葵芳天橋,當時林母邊哭邊說,指丈夫於Bella一歲時,另結新歡,拋妻棄女離家出走:「我已經盡力挽救,我時時喺屋企煲湯等佢,佢係都要一意孤行搬出去住,我都冇辦法。當時生活好徬徨,大女9歲,穎彤得1歲,我好傷心好失意,但我又搵佢(老公)唔到,希望見到佢、叫佢返嚟,或者畀啲生活費,但我搵唔到,等唔到,惟有孭住個女去乞錢。9個月晚晚9點至12點孭住佢行乞,落雨先唔出嚟,冇法,佢個病又難醫,冇錢買奶粉,當時好絕望,好彩有人教我申請綜援。」

婚姻失敗,生活迫人,林母曾在行乞的天橋上,閃現輕生的念頭:一躍而下。她說:「我又病,又畀人迫遷,冇錢買奶粉,冇錢交租,想我哋三母女搬走,又唔敢返屋企,因為隨時有人上嚟拆門劈鐵閘,嚇到我哋成日喺天橋流離浪蕩。當時喺天橋望落下面,就諗不如跳落去啦,當時我孭住穎彤,望落天橋下面時,佢差啲好似瀡滑梯咁瀡落去,好彩捉住佢腳仔先冇事。」

Bella當時聽到母親淚的告白,不禁落淚,並非常懂事,立志長大後要照顧媽媽:「聽到好突然,諗唔到我細個時,佢係咁樣養我,想佢唔好咁辛苦,第時開心啲,唔好再住呢啲樓(公屋),買層靚啲嘅樓畀佢住。想大個搵多啲錢,等媽咪扮靚啲。」林母聞言淚崩:「媽咪唔係要住靚樓,最緊要係你哋兩個身體健康!」然後母女相擁。唔少網友睇完都話非常感動,紛紛留言支持Bella。