【2021 TVB劇】5套最值得期待新劇 《刑偵日記》王浩信惠英紅玩分裂人格 《兒科醫生》有機成台慶劇

【萬千星輝頒獎典禮2020】曲終人散，又係時候洗牌嚟過。今年會有咩TVB新劇值得期待？即刻搵咗5套介紹下︰

《刑偵日記》主演︰惠英紅、王浩信

視帝視后級陣容，惠英紅同王浩信飾演母子，仲要兩個都有精神病，小紅姐嘅角色有精神分裂，擁有6種人格；做仔嘅王浩信劇中因為阿媽失常而驚嚇過度，解離出雙重人格。一聽就知考起兩位演技。查實全套劇唔少角色都有情緒問題，姜皓文演嘅刑偵之父有躁鬱症，惠英紅個女戴祖儀都因為遭遇而受驚失常。至於故事以重案組卧底王浩信被姜皓文賞識加入特案組，同一班專家一齊查案，睇設定似係以角色陰暗面帶動劇情，有睇頭。

《金宵大廈2》主演︰陳山聰、李施嬅

《金宵大廈》以阿蕭同Alex嘅主線，貫穿多個奇幻故事，觀眾反應幾受落。今輯陳山聰同李施嬅角色變成另一對情侶，但係關係若即若離，陳山聰嘅角色喺金宵大廈失蹤後被尋回，之後性格大變，佢同李施嬅再喺大廈遇上各種離奇事。上集部份演員如趙希洛、林子善、張彥博、黃子雄都會以新角色出場，編審透露故事會發生於另一個時空嘅金宵大廈，大玩平行時空，故事隨時比上集更複雜，當堂好期待。而且上次失落視帝視后嘅陳山聰同李施嬅會唔會有機會威返次呢？就要睇劇集反應嘞。

《食腦喪B》主演︰何廣沛、江嘉敏

外國喪屍電影同劇集熱潮過晒，TVB終於肯涉獵呢個題材啦！演員陣容全面年輕化，男女主角係何廣沛同江嘉敏，再搭陳曉華、郭子豪同方紹聰，何廣沛演食腦（真係用口食嗰隻）維生嘅喪屍，江嘉敏就係黑幫千金。吸引之處係想睇一班新演員做成點，同埋到底編劇會點處理呢個題材，睇開外國喪屍戲嘅觀眾可以數下參考咗幾多套作品。不過朱智賢同黎振燁因為呢套劇撻著而搞出不倫緋聞，會唔會令《食腦喪B》變成倉底貨，冇咁快出街？

《欺詐劇團》 主演︰鄭丹瑞、蔣家旻

上年《香港愛情故事》12集完，唔駛為咗就一至五檔期而夾硬搵戲嚟做砌夠20集，加上能夠配合網路平台，結果反應唔錯，估計以後呢種短篇劇會越來越多。剛剛煞科冇耐嘅《欺詐劇團》正正係呢種模式，8集完事，監製竟然唔係新人，而係資深製作人潘嘉德。多年冇拍劇嘅鄭丹瑞飾演過氣電影監製，帶住一班幕後招搖撞騙，聽落幾有趣。男女主角仲有回巢嘅敖嘉年以及「飛躍進步女藝員」蔣家旻，新面孔有簽咗星夢冇耐嘅JW(王灝兒）同林德信。

《兒科醫生》主演︰鄭嘉穎、馬國明、鍾嘉欣、羅子溢、周家怡

5套劇當中《兒科醫生》卡士最強勁，鄭嘉穎、馬國明雙視帝再加本身足以孭飛嘅鍾嘉欣同羅子溢，更令人期待嘅係重返TVB嘅周家怡。觀乎陣容同題材，呢套好有「台慶劇」格局，但就要視乎仲拍緊嘅《白色強人II》邊套行先。值得一睇係編劇（潘漫紅、孫浩浩）同埋監製方俊華都曾經由TVB過檔HKTV再回巢，更加係寫過《導火新聞線》嘅潘漫紅再次為TVB執筆嘅作品。以兒科醫院為背景，希望唔會又係《白色強人》呢類權鬥醫生劇。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！