16歲「美心妹妹」楊鎧凝日本九州留學 考全班第5獲網民大讚叻女

啱啱踏入16歲嘅「美心妹妹」楊鎧凝（Celine），3歲已經入行拍廣告，2013年憑美心廣告而廣受認識，高峰期曾接拍20幾個廣告，更參與TVB《愛我請留言》、《陪著你走》等多套劇集拍攝。不過隨年齡漸長，楊鎧凝減少拍劇專注學業，但仍有積極經營社交網站，與網民分享生活日常。今年4月，Celine前往日本九州留學，升讀高中一年級，近日佢仲出PO分享日本高中嘅成績，全班排名前五位，真係好叻女呀！

鍾情於日本文化嘅楊鎧凝，去年10月開始報讀日本高校，最後獲九州一間寄宿高中成功取錄，今年4月獨自展開日本留學之旅。開學後，Celine不時喺社交網站分享校園生活，佢適應得好好，仲同一班同學仔相處融洽添呀！返港放暑假嘅Celine，近日喺社交網站上載自拍照，並留言分享讀書成績：「在日本留學第一個學期今日完結了, 今日派了成績表, 全班排名前五位，還有進步的空間，下個星期便返香港放暑假了，Yeah 」。

呢個PO一出，唔少網民都留言大讚佢叻女，例如「好叻女呀！繼續加油！可以考到第一名」、「叻女，加油」、「好叻女呀，喺日本識照顧自己」、「排名唔係最重要的，我覺得你可以獨立生活，適應能力又已經好叻」、「勤力的大回報呀！恭喜Celine 」及「叻女！要繼續加油呀」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！