「3好」利誘薛家燕出山賀歲 江嘉敏「得米」拍古裝劇 同龔嘉欣麥美恩爭寵

江嘉敏等到頸長,終開齋拍古裝劇,辛苦啲都唔怕。
江嘉敏等到頸長,終開齋拍古裝劇,辛苦啲都唔怕。

無綫以服裝好、時間好、拍檔好「3好」利誘薛家燕拍賀歲劇,同劇還有「惹火3寶」麥美恩、龔嘉欣及江嘉敏「吵」熱氣氛。如願首度演古裝的江嘉敏未開工先興奮,而麥美恩則自誇古裝扮相有氣質!

無綫將於6月開拍古裝搞笑賀年劇,並由人見人愛、笑口常開的薛家燕坐鎮,擔任奶奶角色,至於3對兒子及新抱則有「大仔、大嫂」曹永廉與麥美恩(Mayanne)、「二仔、二嫂」黃子恆與龔嘉欣、「三仔、三嫂」馬貫東與江嘉敏,3位向來「惹火」的女主角奉旨鬥氣,「吵」旺農曆新年!全劇共8集,定於年三十晚至大年初七播放,拍攝日子貼近夏天,監製吳冠宇向演員大派定心丸,每日只會開一組,服裝方面會以薄料為主,男演員亦不用戴頭套,以免大家拍得太辛苦。

夏天開工唔怕苦

首次拍古裝劇的江嘉敏坦言超級期待,她說:「好多人話拍古裝又熱又要吊威吔好辛苦,但人一世物一世,點都要試吓!我期待拍古裝好耐,成日問監製幾時有得拍,依家得償所願真係好興奮!其實熱我真係唔擔心,都試過夏天着皮褸、毛衣拍劇,OK嘅!」

Mayanne曾與曹永廉在劇集《痞子殿下》合作,今次演夫妻定必擦出火花:「拍古裝好多嘢玩,劇入面我係賭坊太子女,外表好有霸氣,之前拍《痞》覺得自己古裝扮相好有氣質,個妝好有女人味,今次會再花啲心思整靚個樣。」而龔嘉欣則說:「最開心可以同家燕姐合作,今次好多對手戲,好期待快啲開工。」

已4年多沒拍劇的家燕姐,拍此劇的最終目的是希望大家見到她會開心,她說:「我依家都冇乜拍劇,6月開工辛苦啲,但監製話外景較少,衫佢哋會盡量同我就,當然做奶奶唔可以性感,但會薄啲,最重要係有足夠時間休息。」

而3位男主角原來齊齊經營麵檔,大哥曹永廉坦言與Mayanne好熟,絕對有默契;二哥黃子恆之前曾表示希望帶正能量及歡樂給大家,如今願望成真:「第一次拍賀歲劇,好興奮,我哋3兄弟仲會舞獅添!劇入面講我成日病,比較懦弱,但老婆嘉欣就較強悍,佢會幫我出頭,都幾得意。之前疫情期間冇乜嘢做,我喺屋企都有整麵包同麵條,咁啱劇中做麵檔,希望手勢用得着!」而馬貫東首次與江嘉敏合作:「我喺劇中有才華、有禮貌,仲好識冧媽媽!希望擦出搞笑火花,始終古裝節奏要控制得好好先好睇!」

龔嘉欣最開心可以與薛家燕合作,期待盡快開工。
龔嘉欣最開心可以與薛家燕合作,期待盡快開工。
麥美恩飾演賭坊太子女,堪稱霸氣大嫂!
麥美恩飾演賭坊太子女,堪稱霸氣大嫂!
薛家燕
薛家燕



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能