3影帝孭飛 齊齊減磅 劉青雲唔做好人奸到盡

古天樂、劉青雲及郭富城三大影帝孭飛的新片昨早開鏡，由於早前於內地開工個個曬到變黑炭，再加上穿皮褸拍動作戲，難免辛苦到消瘦。激罕演反派的青雲預告角色殘暴，造型連老婆郭藹明亦未曾過目。

電影《掃毒3天大地大》原定於泰國拍攝主景，奈何當地疫情嚴峻，電影公司改於香港搭建「泰國村」，超支近千萬。劇組昨日於數碼港舉行拜神儀式，除了主演的古天樂、劉青雲及郭富城外，還有方中信、謝君豪等現身。

大隊早前完成雲南及汕尾戲份，城城和青雲等均需於炎熱天氣下穿厚褸拍攝，苦不堪言。

甚少演反派的青雲，笑指只是被人誤解：「我都經常演，只係人哋以為係正派，其實我係游走正邪之間，今次就天下無敵，泯滅人性，好殘暴，所有嘢都好盡，好在造型幫到手。今日呢個係前期Look，之後講我走佬去金三角、緬甸，受打擊啲鬍鬚白晒，老婆都冇見過我個造型。」

城城初演臥底角色

談到電影移師香港拍攝，古仔舉腳贊成，免卻舟車勞頓和隔離之苦，說到今次的角色，他說：「總之劇本好複雜，都係有啲泯滅人性！」城城則表示首度演沉重的臥底，加上與古仔及青雲超過15年沒合作，故分外開心。談到日前與太太方媛隔空慶生日，他風騷說：「嗰日視像，兩個女同太太一齊吹蠟燭，係咪好浪漫呢？」

談到日前遭內地公司入稟指控《掃毒2》劇本侵權，身為出品人之一的林小明對此感莫名其妙：「我都冇收到任何法庭文件，團隊肯定係原創製作，會交畀律師處理。」