4歲李元元體重51磅腰圍達26吋 李璨琛順其自然拒逼囡囡減肥

李璨琛同時裝設計師太太梁志瑩嘅4歲囡囡李元元（Lucy）被封為「最萌星二代」，憑冬菇頭、肥嘟嘟嘅可愛樣子同身形、搞怪性格同強大表演慾，無時無刻帶歡樂畀大家，成功迷倒一眾網民，媽媽為佢開設嘅IG帳戶追蹤人數已超過37萬。大家除咗關注Lucy嘅生活點滴之外，同時亦非常關注佢嘅體重，擔心會影響佢嘅健康。

近日佢爸爸李璨琛接受馬來西亞電台訪問，除咗宣傳新電影之外，仲分享自己做爸爸嘅心路歷程，期間提到Lucy現正就讀K1，喺疫情緩和後就會返學，不過之前新買嘅校服一次都未著過就已經唔啱身，因為囡囡嘅身形急速長大。佢仲話Lucy而家51磅，腰圍更達26吋，要著8-10歲尺碼嘅童裝。不過李璨琛就話順其自然同唔會逼囡囡減肥：「小朋友，冇得話夾硬逼佢肥或瘦，總之佢開心食得幾多得幾多，或者佢鍾意做咩就呢段時間俾佢做，佢做得唔啱就同佢講咩係錯，都要俾佢自己探索」，最主要係可以俾Lucy一個愉快嘅童年。

其實，喺今年2月嘅時候媽媽已經幫過Lucy度過三圍數字，並指Lucy嗰時頭圍22吋、胸圍23吋、腰圍26吋及下圍27吋，呢個「元」美身形曝光後，唔少網民都非常關心，例如留言話「新肉女長門人」、「LuLu開始要控制下飲食,我小朋友七歲半 80磅，肝有問題，小時候係可愛但始終對身體唔太好」、「願Lu Lu ...能夠做運動，少吃雪糕，朱古力」、「呢啲叫福氣元啊」、「真係不得之了 由頭開始全部都「二字頭」元美到極 李老豆和李老母都投放不少資源」及「腰圍是成人的size咯」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！