4間$1000以下晚市Omakase推介 最平$380位

·3 分鐘文章

喺香港地食omakase,唔計午市嘅話,好多閒閒地都成千幾二千蚊先埋到單,真係唔係個個荷包都負擔得起呀~今次開飯仔就搜羅咗4間親民版嘅晚市廚師發辦畀大家,價錢大約都係$400至$800左右,雖然平但質素都唔錯,性價比超高!有時返工辛勞咗成日,放工約埋朋友去食好嘢,獎勵下自己就啱喇。

前米芝蓮推薦餐廳班底 雲壽司

呢間平民壽司店當初喺銅鑼灣一開張就立即成為區內人氣之選,皆因佢價錢親民之餘質素仲幾高,所以話咁快已經去埋中環開分店喇。餐廳由前米芝蓮推薦餐廳嘅壽司師傅班底開設,走平價路線,因為老闆想更加多人認識日本料理。雖然平,但仍然堅持選用日本出名嘅新鮮食材~午晚市廚師發辦同價,分三個等級,由最平$380到最貴都只係$680。$380翔套餐包括10件壽司同一條手卷,而$680吟套餐就有7款刺身、7件壽司同一條手卷,供應最時令食材如拖羅、深海池魚同伊佐木等,亦有較少見嘅日本料理,好似魚肝配剝皮魚同吞拿魚腦天即吞拿魚頭嘅肉等,呢個價錢仲要喺港島區,真係好抵!

圖: eddie_ilovefood777
圖: eddie_ilovefood777

西環口碑Omakase小店 神川日本料理

呢一間喺西環好有口碑、儲落唔少熟客嘅日式小店,無鋪天蓋地嘅宣傳,喺網上搵資料亦唔多,亦無華麗嘅裝修,但就長期爆場,要提前個幾兩星期book位添!平時去食omakase,通常都係去到後先知食咩,但呢度就互動性十足,因為食前幾日師傅就會打嚟同你確認菜單,確認你預算同喜好,完全為每一位客人度身訂造咁~價錢最平由$600起至千幾蚊不等,豐儉由人,每一道菜式都感受到師傅嘅認真同誠意,有幾道菜式係必試,如勁鮮甜嘅糖心賴尿蝦、大蔥吉列豬卷、清酒煮蜆同魚湯粥。

圖: Boboyin
圖: Boboyin

旺角區激抵廚師發辦 江戶壽司秀

最平$390嘅omakase套餐,仲要喺旺角區?啱呀你無睇錯呀!呢間日本菜主打江戶時期嘅日式料理,於日本各縣搜羅空運到港嘅新鮮食材,以江戶時代如醋漬、清蒸同紅燒等手法處理。價錢方面兩個廚師發辦套餐都唔過$500,最平$390已經包壽司十貫、手卷同石狩湯;而$480就會多埋幾款刺身。壽司方面推介大拖羅,入口即溶有油香,仲有黑松露帶子香氣好濃,但又無蓋過帶子鮮味~

圖: rummyrummy
圖: rummyrummy

CP值超高 千代鶴 

銅鑼灣人氣日本菜,裝修做到好似高級日本餐廳咁,但供應嘅廚師發辦價錢都好實惠,只係$788就食到!廚師發辦menu每個月都唔同,包括前菜、是日刺身、壽司六貫、海鮮茶碗蒸、厚燒日本和牛配松露麵豉醬、甜品同是日清酒或果酒一杯,刺身同壽司都食得出好新鮮,特別一提個和牛,入口軟腍牛味突出,最正係個松露麵豉醬夠晒香,味道層次更豐富。

圖: GavinX402
圖: GavinX402
我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能