5間必食酸菜魚！川菜名店、特色冷鍋酸菜魚

唔知由幾時開始香港漸漸興起食辣度十足嘅川菜，好似酸菜魚、水煮牛呢啲傳統川菜菜式都好受歡迎！今期介紹5間具有特色嘅酸菜魚畀各位麻辣控，有傳統川菜名店亦有各路小店，唔知邊間啱你心水？

四十年經驗大廚主理 鄧記川菜 

呢間川菜名店由祖籍四川、入廚逾四十多年嘅鄧華東大廚主理。堅持「粗菜細做，細菜精造」嘅精神，所以每一道菜都食得出師傅誠意。招牌酸菜桂魚湯頭味道好平衡，酸度同鹹味都恰到好處，然後食到魚嘅鮮甜。選用多肉少骨嘅桂花魚，魚肉有先走油，嫩滑得嚟魚肉又唔會散晒，食得出師傅功夫，而且酸菜同魚肉份量都好足，鍾意酸菜魚嘅朋友點都要試一次。

真材實料酸菜魚 十十四川料理 

呢度嘅招牌酸菜魚，湯底以雞腳、雞殼及豬骨熬製一晚而成，再加入老壇酸菜同自家製醬汁同新鮮鱸魚，鮮香味濃，酸辣開胃，麻同酸味道都好平衡，除咗酸菜同魚仲有大量薯粉墊底，索晒湯好入味呀。特別一提餐廳早前仲推出咗創意點心酸菜魚小籠包，有興趣可以去嚐鮮！

必食冷鍋酸菜魚 捌壹壹

冷鍋嘅意思，係將酸菜魚鍋煮熟就上枱，因為魚肉易碎，所以就唔邊滾邊食喇，不過食嗰陣一樣熱辣辣㗎！魚片嫩滑彈牙，無骨啖啖肉，配菜有萵筍、芽菜、金菇同寬粉，份量極多，好抵食呀～

一人酸菜魚 麻王

酸菜魚好多時都大大份，呢間以外賣為主嘅店舖就主打一人份嘅酸菜魚，會送埋白飯，難怪成為附近上班族嘅飯堂喇。而且呢度啱晒唔食得辣嘅朋友，因為店主想大家食得開胃啲，酸菜魚以酸酸甜甜為主，而辣味就會以面頭嘅辣椒乾或辣粉爆香稍作調味，所以相比起坊間嘅酸菜魚會無咁辣，店主建議鍾意辣嘅朋友叫水煮魚！

老壇酸菜魚 點.魚

呢間川菜供應兩款酸菜魚，分別係招牌老壇酸菜魚及青藤椒酸菜魚，前者湯底加入魚骨、泡薑、泡椒、花椒粒等熬製，再加入老壇酸菜，味道會較酸。而青藤椒酸菜魚主打麻味，麻香加上酸菜層次更豐富，食完真係成個嘴都麻晒，揀邊款就睇返個人口味喇～

文: Yanica