55歲盧慶輝回巢拍《香港人在北京》 外貌身型零走樣令網民驚嘆：不老男神

現年55歲嘅盧慶輝（Marco）當年喺劇集《真情》中飾演高大靚仔嘅唐立生，深得觀眾喜愛，更被封為「師奶殺手」。之後佢再喺劇集《封神榜》中飾演伯邑考，被人殺死後製成肉丸嗰一幕，令人印象深刻，至今大家依然歷歷在目。之後佢選擇棄影從商並移居北京，不過大家間唔中都有機會喺影視作品見到佢嘅蹤影，而喺即將播出嘅TVB新劇《香港人在北京》都有佢嘅演出，佢嘅身型同外貌都keep得好好，完全睇唔出已經年過50歲。

當時拍攝《真情》時，盧慶輝人氣正在急升，不過因負面新聞不斷，令其飽受壓力，最終2001年決定轉行，轉展內地從商，發展房地產事業。之後佢亦間唔中再喺幕前客串演出，參與《賭城群英會》、《獨孤天下》、《大宋少年志》、《劍王朝》、《PTU機動部隊》及《暗房》等等，今次佢喺《香港人在北京》飾演陳展鵬嘅同事，相信唔少香港觀眾會期待嘅佢嘅演出。

另外，盧慶輝近日更進駐小紅書，一直保養得宜嘅佢令唔少網民驚嘆佢嘅凍齡外表，例如「唐立生你食左咩牌子防腐劑」、「為什麼20年過去還是沒有變樣」、「立生基本上都冇變過樣咁」、「不老男神」、「沒變化啊，還是那麼帥氣」及「天啊都沒有老的痕跡」等等。唔少網民仲留言問佢點保養，而佢就喺小紅書拍片表示自己嘅保養秘笈就係多運動。

久未露面嘅Marco喺傳媒訪問時曾經講過自己已經移居內地15年，已與家人定居於北京，佢仲表示好鍾意住喺嗰度，因為感覺好安全同令佢覺得好幸福。其實Marco喺2011年與太太小青喺北京工作認識，拍拖三日就已認定對方為終於伴侶，婚後二人育有一子，一家三口幸福美滿。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！