68歲墨西哥女星Lyn May宣佈懷孕 相差40載男星坦認曾「共度一宵」？

68歲墨西哥女星Lyn May日前喺IG宣佈自己懷孕3個月，同時上載與29歲男歌手Markos D1嘅合照，指Markos D1係寶寶嘅爸爸，並稱「他會很高興做爸爸的」。不過，Markos D1就表示自己毫不知情，只係見到對方喺IG Tag咗自己，加上有好多人問佢先知道呢個消息，覺到成件事太瘋狂。

Lyn May擁有中國血統，據指佢曾經喺入行前做過艷舞女郎，結過7次婚，又被傳過同墨西哥第51任總統José López Portillo有過一段關係。Markos D1同Lyn May透過音樂創作而認識，亦喺2019年合作過MV拍攝；而Markos D1就同外媒否認曾同Lyn May拍拖：「我是她的粉絲，很高興她參與我的MV，那是我們之間關係的起點，但就僅止於MV。」 不過，Markos D1就承認幾個月前曾與Lyn May過夜；事緣係有次出席活動，二人飲太多酒而醉倒，Markos D1喺醉昏昏嘅情況下答應Lyn May借宿一宵嘅要求，雖然翌日起身咩都唔記得，但就強調佢哋係分床睡。

對於Lyn May所分享嘅甜蜜合照，Markos D1澄清係當年拍攝MV同出席活動嘅舊照片；而自己做爸爸嘅消息，佢就話感覺對方係利用自己博宣傳，對方手機亦一直關機，未能聯絡到佢，但Markos D1就表示：「如果她真的懷孕，我希望在身邊幫助和陪伴她。」至於被問及如果事件屬實，二人會否結婚，Markos D1就認爲對方已經結過7次婚，應該唔會想再結婚。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！