75歲秦煌有個細30年內地情人知己 唔介意愛人搵人經手懷孕 視「女兒」如己出

近排李龍基同年紀相差36載嘅女友Chris Wang王青霞多次傳出新聞，唔少人都關注基哥喺內地以至香港嘅物業去向。而另一資深藝人、75歲嘅秦煌，原來早過李龍基北上尋真愛，多年前已經有細佢30年嘅「情人知己」，仲喺愛人家鄉湖南置業。

秦煌北上居住深圳20年，佢自爆搬上去住嘅時候，搵咗個20歲女仔幫佢打理家務，呢個女仔就係佢後來嘅「情人知己」Mary。秦煌話叫過Mary走，但愛人冇理會，仲將買餸錢「打釜頭」儲起，加埋秦煌資助嘅幾十萬喺湖南買咗樓。現時秦煌有工作就返香港租地方住，其他時間住深圳，愛人會坐高鐵由湖南落去搵佢。訪問中秦煌大讚內地女性唔會好似港女咁，問男士有冇錢有冇樓。

秦煌同分居多年太太莫佩雯育有4個仔女，而Mary曾經向秦煌提出想生小朋友，秦煌表明拒絕，但唔介意對方用自己方式有小朋友。後來Mary懷孕並誕下一女，個女11個月大嘅時候兩母女返去深圳同秦煌生活。而家Mary個女8歲，秦煌視如己出，希望搵到錢供繼女讀書。秦煌直言冇過問繼女生父是誰，Mary亦冇提過。

講起內地愛人呢個話題，秦煌唔覺意爆咗老友李龍基秘密，話基哥以前同佢做過鄰居，多年前用80萬喺福田買1300呎樓，秦煌有去參觀過，仲話當時基哥有個好後生嘅女友叫「霞女」，以為而家嗰位（Chris）係同一個人……咦？

去年離開TVB後，秦煌接吓內地同香港製作影視作品演出，自言勉強夠使。近年健康狀況備受關注，秦煌而家喺香港一年覆診3次，減磅幾十磅後醫生冇再叫佢減肥。舊年秦煌同另一TVB舊人林偉見面，林拍片分享上小紅書，片中林偉笑秦煌「好大陣『老煌除』」，仲問佢有冇沖涼。

原名梁日成嘅秦煌，28歲時因為任職商台主持人嘅太太莫佩雯介紹而認識商台創辦人何佐芝，繼而有機會參與佳視《射鵰英雄傳》試鏡而入行。秦煌七八十年代喺佳視及TVB分別拍過《射鵰英雄傳》，都係由秦煌飾演周伯通，老頑童形象深入民心。1992年嘅處境劇《卡拉屋企》，秦煌飾演嘅肥舅父（廖仲德）亦都係佢嘅代表作。

秦煌早年接受訪問時提到，以前因為工作關係無咩時間放喺家庭之上，作為父親唔會點管仔女同時亦唔多溝通。2017年逝世嘅莫佩雯，生前同秦煌已經分居，莫曾經提出離婚6次，但秦煌每次都拒絕。

秦煌2020年返TVB出席《踩過界2》宣傳活動時，喺電視城門口「差錯腳」跌倒而要送院，一度有傳佢心臟有事。後來秦煌澄清冇其他身體毛病，不過膊頭骨裂要留院觀察。而秦煌2008年喺長洲同李家聲等一班朋友飲完酒，坐渡輪出市區時喺碼頭跌落海，頭部撞到木樁受傷一度昏迷，要由直升機送院搶救，一度入住深切治療部，好在後來康復出院。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！