903籃球賽｜森美對比20年前竟然仲後生咗 網民：想問下食咩牌子防腐劑

《903 AllStar 籃球賽》相隔多年喺日前再度展開，以往都有唔少歌手紅人參加過，當中包括周杰倫、陳冠希、余文樂、容祖兒、Twins及陳奕迅等等。喺噚日（13日），903 DJ森美喺社交網站上載多張當年籃球賽照片，亦有佢自己20年前同而家嘅外貌對比，唔少網民都留言大讚佢大隻咗又靚仔咗。

森美喺噚日上載多張當年籃球賽照片，並感觸留言：「二十年啦，真心感觸，盡力啦，我呢個甘草會繼續服務樂壇，同每一代偶像歌手打到無力，不過有一電台前輩比我打得更耐，為音樂打拼更搏，佢就係黃志淙! Respect!!」。唔少網民睇完森美嘅20年前同而家外貌嘅對比照片，都紛紛留言大讚「有變咩 二十年都一樣」、「想問下食咩牌子防腐劑」、「大隻咗再靚仔咗」、「​​依然咁靚仔 20年後仲後生咗」、「好似你而家仲靚仔過之前」、「你都冇乜變過」、「森美大哥 除髮型無變」、「無變過，只係多了一份穩重味」及「痴線 食左 防腐劑」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！